१३ मेगावाटकाे माथिल्लो सेती-१ को काम ३ वर्षभित्र पूरा गरिने

काठमाडौं । गण्डकी प्रदेशको कास्की जिल्लामा पहिचान भएको १३ मेगावाटको माथिल्लो सेती–१ जलविद्युत आयोजनाको काम आगामी ३ वर्षभित्र पूरा हुने भएको छ । जिल्लाको पोखरा महानगरपालिका वडा नम्बर १९ र २५ तथा माछापुच्छ्रे गाउँपालिकाको वडा नम्बर २, ३ र ४ मा पहिचान भएको आयोजनाको काम श्रेष्ठ इनर्जी सोलुसन प्रालिले २०८२ भित्र पूरा गर्ने भएको हो ।

अध्ययन पूरा भएको आयोजनाको उत्पादन अनुमति दिने तयारी अन्तिम चरणमा पुगेको विद्युत विकास विभागले जनाएको छ । विभागले कम्पनीलाई अनुमति दिन ३५ दिने सूचना जारी गरेको छ ।

आयोजना निर्माण तथा सञ्चालन गर्दा उल्लेखनीय असर पर्ने भएमा यो सूचना जारी भएको मितिले ३५ दिनभित्र सम्बन्धित सरोकारवालाले आफ्नो लिखित राय/सुझाव विभाग वा कम्पनीको कार्यालय प्राप्त हुने गरी पठाउनु पर्नेछ ।

आयोजनाको बाँधस्थल माछापुच्छ्रे गाउँपालिकाको वडा नम्बर २ र ३ को सिमानामा र विद्युत गृह पोखरा महानगरपालिकाको वडा नम्बर १९ मा पर्ने घट्टे खोलासँगैको दोभानभन्दा माथिल्लो पट्टि सेती नदीको बायाँ किनारमा रहनेछ ।

बाँधबाट ४०५५ मिटर लामो हेडरेस पाइपमार्फत पानीलाई विद्युतगृहमा पुर्याइनेछ । विद्युतगृहमा जडित ३ वटा टर्वाइनमा पानी खसाली सो टवाईनसँग जोडिएको ३ वटा जेनेरेटरमार्फत विद्युत उत्पादन गरिनेछ ।

आयोजनाबाट वार्षिक ८३.६१ गिगावाट घन्टा विद्युत उत्पादन हुनेछ । आयोजनाको सबै काम पूरा गरेर २०८२ भित्र विद्युत उत्पादन सुरु गरिनेछ । उत्पादित विद्युत ३३ केभी प्रसारण लाइनमार्फत ३.५ किलोमिटर दुरीमा रहेको नेपाल विद्युत प्राधिकरणको लाहाचाक सबस्टेसनमा जोडिनेछ ।