ऊर्जा खबर
काठमाडौं । राष्ट्रिय गौरव तथा पहिलो र दोस्रो प्राथमिकतामा परेका १० आयोजनाको काम ८० प्रतिशत बढी सकिएको छ । महालेखा परिक्षकले बुधबार (असार २९ गते) सार्वजनिक गरेको प्रतिवेदनमा १० आयोजनाको काम अन्तिम चरणमा पुगेको उल्लेख गरेको छ ।
ऊर्जातर्फ परेका ४० आयोजनामध्ये पहिलो प्राथमिकतामा ३८ आयोजना छन् । यी आयोजनामध्ये १० आयोजनाको काम ८० प्रतिशत सकिएको प्रतिवेदनमा उल्लेख छ । यस्तै, १३ आयोजनाको ५० देखि ८० प्रतिशत काम सकिएको छ । बाँकी १५ आयोजनाको भने ५० प्रतिशत भन्दा कम प्रगति देखिएको प्रतिवेदनमा उल्लेख छ ।
यस्तै, दोस्रो प्राथमिकतामा परेका २ आयोजनामध्ये एक आयोजनाको काम पनि ८० प्रतिशत बढी सकिएको छ । बाँकी एक आयोजनाको ५० देखि ८० प्रतिशत सकिएको छ ।
जलस्रोत तथा सिँचाइ तर्फको २२ आयोजनाको निर्माण ८० प्रतिशत बढी सकिएको छ । ७ आयोजनाको प्रगति ५० देखि ८० प्रतिशत र ४ आयोजनाको प्रगति ५० प्रतिशत भन्दा न्यून रहेको छ । राष्ट्रिय गौरवमा परेका यी आयोजनाको कार्यान्वयनमा प्रभावकारीता ल्याई कार्य प्रगतिमा सुधार गर्नुपर्ने प्रतिवेदनले औंल्याएको छ ।
२०७७÷७८ सम्म राष्ट्रिय गौरव तथा पहिलो र दोस्रो प्राथमिकतामा ७३ आयोजना परेका छन् । जसमा १९ आयोजनाको प्रगति ५० प्रतिशतभन्दा कम रहेको प्रतिवेदनमा उल्लेख छ ।
