ऊर्जा खबर
काठमाडौं । विद्युत विकास विभागले ६६ केभी भन्दा कम क्षमताका ६९ विद्युत प्रसारण लाइन आयोजनालाइ निर्माण अनुमति दिएकाे छ । विभागले नेपाल विद्युत प्राधिकरण र निजी ऊर्जा उत्पादकले निर्माण गरिरहेको जलविद्युत आयोजनाको विद्युत प्रवाह गर्न यी प्रसारण लाइन आयोजनालाइ निर्माण अनुमति दिएकाे हो ।
निर्माण सम्पन्न भएका, निर्माणधीन र निर्माणमा जाने आयोजनाको विद्युत प्रवाह गर्ने उदेश्यले सरकार तथा निजी क्षेत्रले प्रसारण लाइन आयोजना निर्माण अनुमति पाएकाे विभागले जनाएको छ । विभागका अनुसार यी आयोजनाहरु निर्माणका विभिन्न चरणमा छन् । ११ केभी, ३३ केभी र ६६ केभीका प्रसारण लाइनले अनुमति पाएका हुन् ।
अनुमति पत्र जारी भएका लाइनमध्ये ६६ केभीको ५ आयाेजना छन् । प्राधिकरणले चिलिमे–देवीघाट र के–३ प्रसारण लाइन निर्माण गर्न अनुमति पाएकाे छ । यस्तै, मैलुङ खाेला जलविदुयत कम्पनीले मैलुङ खोला, माण्डु हाइड्रो पावरले बागमती–कुलेखानी र श्री चिलिमे जलविद्युत कम्पनीले सान्जेन– चिलिमे प्रसारण लाइन निर्माण अनुमति पाएकाे विभागकाे वेपसाइटमा उल्लेख छ ।
साथै, ११ केभीको एक मात्र सुनकोशी सानो प्रसारण लाइनले निर्माण अनुमति पाएको छ । यो प्रसारण लाइनले २०६० वैशाख ५ गते निर्माण अनुमति पाएको थियो । ३३ केभीको ६३ वटा प्रसारण लाइन पनि निर्माणको विभिन्न चरणमा पुगेका विद्युत विकास विभागको तथ्याङ्कमा उल्लेख गरिएको छ ।
यस्तै, उच्च क्षमताका १३२ केभीदेखि ४ सय केभी क्षमतासम्मका १०७ प्रसारण लाइन आयोजना निर्माण गर्न अनुमति जारी गरिएको छ । विभागका अनुसार यी आयोजना निर्माणका विभिन्न चरणमा छन् । १३२ केभी क्षमताका ८०, २२० केभी क्षमताका २३ र ४०० केभी क्षमताका ४ प्रसारण लाइनले निर्माण अनुमति पाएका छन् ।
