ऊर्जा खबर
काठमाडौं । स्वतन्त्र ऊर्जा उत्पादकहरूको संस्था नेपाल, (इपान) ले प्रदेश-१ कमिटि गठन गरेकाे छ । जलविद्युत प्रवर्द्धक डेडराज खड्काकाे संयाेजकत्वमा शुक्रबार कमिटि गठन गरिएकाे हाे ।
प्रदेश-१ अन्तर्गतका जलविद्युत आयोजना निर्माणमा देखिने समस्याकाे नीतिगत समाधान गर्ने उद्देश्यले कमिटि गठन गरिएकाे इपानले जनाएकाे छ । इपानका अनुसार खड्का संयाेजक रहेकाे कमिटिमा रमेशप्रसाद न्याैपानेलाई सह-संयाेजक ताेकिएकाे छ ।
यस्तै, साेमनाथ कँडेल सचिव र कुमार खरेल काेषाध्यक्षमा नियुक्त भएका छन् । कविन महर्जन, रोशन बस्ने, दिपक राई, गोपाल मैनाली र तारा सुब्बा कमिटीकाे सदस्य चयन भएका छन् ।
कमिटिले प्रदेश-१ मा निजी क्षेत्रकाे लगानीका निर्माणाधीन, सञ्चालनमा रहेका तथा अध्ययनकाे चरणमा रहेका एवं पहिचान भएका जलविद्युत आयोजनामा आइपरेको समस्याकाे अध्ययन गरी समाधानकाे पहल गर्नेछ ।
प्रदेश १ मा करिब १२ हजार ९ सय ५३ मेगावाट विद्युत उत्पादनकाे सम्भावना छ । याे प्रदेशका झापा, माेरङ, सुनसरी, उदयपुर बाहेकका इलाम, पाँचथर, ताप्लेजुङ, संखुवासभा, तेह्रथुम,, भोजपुर, धनकुटा, खोटाङ, सोलुखुम्बु, ओखलढुङगालगायत जिल्लामा जलविद्युत उत्पादनकाे सम्भावना छ । जलविद्युत उत्पादनकाे सम्भावना रहेका जिल्लामा निजी क्षेत्रकाे लगानीमा धेरै आयोजना अघि बढेका छन्।
इपानकाे विधानअनुसार प्रदेश-१ कमिटि गठन गरिएकाे हाे । अब क्रमशः ७ वटै प्रदेशमा कमिटि चयन गरिने इपानले जनाएकाे छ । सबै प्रदेशका संयाेजकहरू यसअघि नै चयन भइसकेका छन् ।
२०७६ माघ १० गते बसेको इपान सञ्चालक समितिको बैठकले ११ सदस्यीय कार्यसमिति विस्तार गरी २३ पुर्याउने उद्देश्यले विधान संशोधन गरेको थियो । जसअनुसार प्रदेशमा एक–एक जना संयोजक तोक्ने प्रावधान छ ।
