ऊर्जा खबर
काठमाडौं । दोलखा जिल्लामा ६.४ मेगावाटको सुरी खोला जलविद्युत आयोजना निर्माण गरी सञ्चालनमा ल्याएको मकर जितुमाया सुरी हाइड्रो पावर लिमिटेडले सर्वसाधारणका लागि निष्कासन गरेको साधारण सेयर बाँडफाँड गरेको छ ।
आज बिहीबार (चैत २९ गते) एक कार्यक्रमका बीच कम्पनीको धितोपत्र निष्कासन तथा बिक्री प्रबन्धक प्रभु क्यापिटल लिमिटेडको कार्यालय, कमलादीमा उक्त सेयर बाँडफाँड गरिएको हो । कम्पनीले सर्वसाधारणका लागि गत चैत १९ गतेदेखि २२ गतेसम्म सेयर निष्कासन तथा बिक्री खुला गरेको थियो ।
कम्पनीले सर्वसाधारणका लागि निष्कासन गरेको १०० रुपैयाँ मूल्य अंकित १३ लाख ३७ हजार ३०२ कित्ता सेयर बिक्री खुला गरेको थियो । तोकिएको समयभित्र मागभन्दा अधिक सेयर आवेदन परेको जनाइएको छ । सेयर खरिद गर्नका लागि रितपूर्वक १२ लाख ८१ हजार ४०२ जनाले आवेदन दिएकोमा १ लाख ३३ हजार ७३० जनालाई १० कित्ताका दरले र २ जनालाई थप १ कित्ता गरी माग गरिएको सेयर बाँडफाँड गरिएको प्रभु क्यापिटलले जानकारी दिएको छ ।
कम्पनीले सञ्चालनमा ल्याएको सुरी खोलाबाट चालू वर्षको बैशाख २८ गतेदेखि व्यावसायिकरूपमा विद्युत उत्पादन गरी राष्ट्रिय प्रसारण लाइनमा जडान गरेको थियो । हाल, सोही खोलामा ७ मेगावाटको माथिल्लो सुरी खोला निर्माण गरिरहेको छ । जसको हालसम्म ८५ प्रतिशत भौतिक प्रगति भएको जनाइएको छ ।
.jpg)
