ऊर्जा खबर
काठमाडौं । नेपाल हाइड्रो डेभलपर कम्पनीले १५ प्रतिशत बोनस सेयर र ०.७८९५ प्रतिशत नगद लाभांश दिने भएको छ । कम्पनीले आर्थिक वर्ष २०७६/७७ सम्मको सञ्चित मुनाफाबाट बोनस सेयर र नगद लाभांश वितरण गर्न लागेको हो ।
आफ्ना सेयरधनी सदस्यलाई मुनाफाबाट कायम भएको चुक्ता पूँजीको १५ प्रतिशत हुन आउने ३ करोड ९० लाख रुपैयाँ बराबरको बोनस सेयर दिने कम्पनीले जनाएको छ । कम्पनीका अनुसार ०.७८९५ प्रतिशत हुन आउने २० लाख ५२ हजार ६ सय ३२ रुपैयाँ नगद लाभांश वितरण गरिनेछ ।
आगामी चैत १७ गते हुने वार्षिक साधारणसभाबाट पारित भएपछि बोनस सेयर र नगद लाभांश वितरण गरिनेछ । कम्पनीले आर्थिक वर्ष २०७४/०७५, ७५/७६ र ७६/७७ को साधारण सभा एकै पटक गर्दैछ ।
कम्पनीले यसअघि २०७४/७५ को नाफाबाट ४ प्रतिशत बोनस सेयर दिने घोषणा गरेको थियो । तर, साधारणसभा हुन नसक्दा पारित नभएपछि खारेज भएको थियो । उक्त ४ प्रतिशत बोनस सेयर समेत समावेश गरी अहिले १५ प्रतिशत बोनस प्रस्ताव गरिएको कम्पनीले जनाएको छ ।
कम्पनीको दोलखामा ३.५२ मेगावाटको चरनावती खोला जलविद्युत आयोजना सञ्चालनमा छ । यो आयोजनाबाट २०७० जेठदेखि विद्युत उत्पादन भइरहेको छ ।
