ऊर्जा खबर
काठमाडौं । कर्णाली प्रदेशको जुम्ला जिल्लास्थित तिला गाउँपालिको ४ नम्बर वडाका ५ सय घरधुरीमा राष्ट्रिय प्रसारण प्रणालीको विद्युत पहुँच पुग्न लागेको छ । नेपाल विद्युत प्राधिकरण जुम्ला वितरण केन्द्रले वितरण लाइन विस्तार गरी वडाको सापुल्ली र नुवाकोट गाउँमा विद्युत पहुँच पुर्याउन लागेको हो ।
गाउँमा विद्युत पहुँच पुर्याउन सापुल्लीदेखि नुवाकोटसम्म वितरण लाइन विस्तारको काम धमाधम भइरहेको वितरण केन्द्र प्रमुख नरेश रावलले बताए । उनका अनुसार विद्युत पहुँच विस्तार हुँदा सापुल्ली गाउँका करिब ३ सय घरधुरीले राष्ट्रिय प्रणालीको सेवा पाउने छन् । नुवाकोट गाउँका २ सय घरधुरीमा पनि विद्युत पहुँच पुग्नेछ ।
‘जुम्लामा ६ महिनाअघि मात्रै पहिलो पटक राष्ट्रिय प्रसारण प्रणालीको विद्युत पहुँच पुगेको हो,’ उनले ऊर्जा खबरसँग भने, ‘सबै स्थानीय तहमा विद्युतीकरण विस्तार गर्ने योजना अनुरुप अहिले सापुल्ली र नुवाकोट गाउँमा लाइन विस्तारको काम भइरहेको छ ।’
उनले विद्युत मिटर वितरण गरेपछि स्थानीयबासीलाई राष्ट्रिय प्रणालीको विद्युत सेवा दिन सुरु गरिने पनि उनले बताए । यस्तै, जिल्लाको तातोपानी गाउँपालिकाको वडा नम्बर ७ र ८ मा विद्युतीकरण विस्तार गर्न ठेकेदार छनोटको प्रक्रियामा रहेको रावलले जानकारी दिए ।
ठेकेदार छनोटको चरण पूरा भएपछि २ वडाको सर्मी, सुर्की र ताम्ती गाउँमा वितरण लाइन विस्तार कार्य सुरु हुनेछ । ठेकेदार छनोटको प्रक्रिया पूरा गरी वितरण लाइन विस्तारको काम सुरु गर्न अझै २ महिना लाग्ने पनि उनले बताए ।
जिल्लाका तातोपानी र तिलामा सञ्चालित अधिकांश लघुजलविद्युत आयोजना गत बर्खाको बाढीले क्षतिग्रस्त बनेर सञ्चालनमा आउन नसकेका कारण स्थानीयले विद्युतीकरण विस्तार गर्न प्राधिकरणसमक्ष माग राख्दै आएका थिए । बाढीले क्षतिग्रस्त लघुजलविद्युत आयोजनाको पुनर्निर्माण नहुँदा यहाँका स्थानीय अँध्यारोमा बस्न बाध्य छन् ।
बजेट अभावमा बाढीले भत्किएका लघुजलविद्युतको संरचना पुनर्निर्माण नहुँदा स्थानीयले राष्ट्रिय प्रसारण प्रणालीको सेवा विस्तारको माग गर्दै आएका छन् । विद्युतीकरण विस्तारको माग गर्दै नेकपा माओबादी केन्द्रका संघीय सांसद गजेन्द्रबहादुर महतको नेतृत्वमा जुम्लाबासीले प्राधिकरणको केन्द्रीय कार्यालय अगाडि बाजा गाजासहित प्रदर्शन गरेका थिए । जिल्लामा पूर्ण विद्युतीकरण गर्न प्रसारण तथा वितरण लाइनको निर्माण एवं विस्तार हुनुपर्ने जुम्लाबासीकाे माग छ ।
