नेपालको जलविद्युत्‌सहित नवीकरणीय ऊर्जा परियोजना विकासमा जोड दिने सहमति

काठमाडौँ । नेपाल–भारत संयुक्त व्यापार मञ्च (जेबीएफ) को दोस्रो बैठकमा जलविद्युत्, सौर्य तथा वायु ऊर्जा जस्ता नवीकरणीय ऊर्जा परियोजनाको विकासमा सहकार्य गरी स्वच्छ ऊर्जा प्रवर्द्धनमा जोड दिने सहमति भएको छ । काठमडौँको चन्द्रागिरिमा भएको बैठकमा दुई देशका प्रतिनिधिहरूबीच यस्तो सहमति भएको हो । वाणिज्य सचिवस्तरीय वैठककै अंगको रूपमा रहेको जेबीएफ बैठकमा ऊर्जा विकासमा लगानीका विविध सम्भावनाबारे छलफल भएको थियो । साथै बैठकमा व्यापार, लगानी पर्यटन, कृषि, सूचना प्रविधि र पूर्वाधार विकास लगायतका अन्य विविध क्षेत्रका विषयमा समेत छलफल भएको थियो ।

बैठकमा नेपाल उद्योग वाणिज्य महासंघका अध्यक्ष चन्द्रप्रसाद ढकालले नेपाल र भारत बीच आर्थिक क्षेत्रमा अथाह सम्भावना रहेको उल्लेख गर्दै दुवै क्षेत्रमा देखिएका समस्या समाधानका लागि नीतिगत सुधार तथा व्यवहारिक समाधान खोजेर अघि बढ्नुपर्ने बताए । उनले नेपालका जलविद्युत् तथा अन्य पूर्वाधार निमार्णका लागि आवश्यक विस्फोटक पदार्थको आपूर्ति भारतले सहज बनाउनुपर्ने बताए । 

उनले गैर–भन्सार अवरोध हटाउने, नेपाली वस्तु निर्यातमा ब्यूरो अफ इन्डियन स्ट्यान्डड्र्स (बिआइएस) को प्रमाणीकरण प्रक्रियाले गर्दा देखिएको समस्या समाधानका लागि सहजीकरण गर्ने, भैरहवा र पोखरा विमानस्थलसँग भारतका शहर जोड्ने जस्ता विषय अघि बढान आग्रह गरेका थिए । त्यस्तै, मुन्द्रा (गुजरात), धामरा (ओडिशा) र जवाहरलाल नेहरू (मुम्बई) लगायतका भारतीय बन्दरगाहमा नेपालको पहुँच विस्तारको विषयहरु उठान गरे ।  

बैठकमा भएका सहमतिका विषयलाई शनिबार नै नेपाल र भारतका वाणिज्य सचिवलाई हस्तान्तरण गरिएको छ । भारतीय वाणिज्य सचिव सुनिल वर्थवाल र नेपालका वाणिज्य सचिव गोविन्दबहादुर कार्कीलाई मञ्चका अध्यक्ष भवानी राणा र सन्थिल कुमारले सो सहती हस्तान्तरण गरेका हुन् ।   

बैठकमा सीमापार व्यापार र लगानी सहज बनाउने, कनेक्टिभिटी, सडक, रेल र हवाई सम्पर्क सुदृढ गर्ने, कृषि र औषधीय उत्पादनको कोटा हटाई उच्च बीउ तथा प्रविधि उपलब्ध गराउने, डिजिटल प्रविधि र स्टार्टअप सहयोग लगायतका विषयमा आवश्यक सहजीकरण गर्ने सहमति भएको छ । दुवै देशले व्यापारमा देखिएका समस्या समाधान गर्न सहकार्य गर्ने प्रतिबद्धता समेत व्यक्त गरेका छन् ।