ललितपुर र मकवानपुरका स्थानीयले माण्डु हाइड्रोको सेयर आवेदन दिने आज अन्तिम दिन

काठमाडाैं । माण्डु हाइड्रो पावर लिमिटेडको सेयर आवेदन दिने आज (शुक्रबार) अन्तिम दिन रहेको छ । कम्पनीले असार २८ देखि आयोजना प्रभावित ललितपुर र मकवानपुर जिल्लाका स्थानीयको लागि खुल्ला गरेकाे सेयर आवेदन अवधि आज साँझ ५ बजेबाट सकिन लागेकाे हाे ।

कम्पनीले अंकित मूल्य १०० रुपैयाँमा १०६ रुपैयाँ प्रिमियम थपेर प्रति कित्ता २०६ रुपैयाँमा सेयर निष्कासन गरेको हो  । कम्पनीले २ लाख ७२ हजार ७ सय ३० कित्ता सेयर आयोजना प्रभावित ललितपुर र मकवानपुर जिल्लाका स्थानीयबासीलाइ निष्कासन गरेको छ । यसमा ललितपुरको बागमती गाउँपालिकाको वडा नम्बर १ र २, मकवानपुर जिल्लाको भीमफेदी गाउपालिकाको वडा नम्बर ५,६, ७, र ८, तथा इन्द्र सरोबर गाउपालिकाको वडा नम्बर ३ का स्थानीयले आवेदन दिन सक्ने छन् । 

स्थानीयले न्युनतम १० कित्तादेखि अधिकतम ५० हजार कित्तासममका लागि आवेदन दिन सक्नेछन् ।  सेयर निष्कासन गरी बाँडफाँड गर्न प्रभु क्यापिटल बिक्रि प्रबन्धक ताेकिएकाे छ । कम्पनीले श्रम स्वीकृति लिई वैदेशिक रोजगारीमा रहेकालाई सेयर निष्कासन गरि बाँडफाँड गरिसकेकाे छ । अब,  स्थानीयकाे सेयर बाँडफाँडपछि सर्वसाधारणका लागि सेयर निष्कासन गर्ने कम्पनीले  जनाएकाे छ ।

कम्पनीले २२ मेगावाट क्षमताको बागमती जलविद्युत आयोजनाको निर्माण गरी सञ्चालन गरिरहेको छ । सो आयोजनाले २०७५ चैत्र १८ गतेबाटै विद्युत उत्पादन गरिरहेकाे छ ।