ऊर्जा खबर
काठमाडौँ । बिहीबारदेखि ३ दिनसम्म देशभर सामान्यदेखि अति भारी वर्षाको सम्भावना रहेकोले सतर्क रहन जल तथा मौसम विज्ञान विभागअन्तर्गतको मौसम पूर्वानुमान महाशाखाले आग्रह गरेको छ । मनुसुनको न्युन चापीय रेखा नेपालतर्फ सरिरहेकोले देशभर हल्कादेखि मध्यम स्तरको र केही स्थानमा भिषण वर्षाको सम्भावना देखिएको महाशाखाले जनाएको छ ।
बुधबार रातीदेखि शनिबार बिहानसम्म देशभर साधारणदेखि पूर्णतया बदली रहने जनाएको छ ।
महाशाखाका अनुसार कोशी प्रदेश, मधेश प्रदेश, बागमती प्रदेश, गण्डकी प्रदेश, लुम्बिनी प्रदेशका अधिकांश स्थानहरूमा र कर्णाली प्रदेश र सुदूरपश्चिम प्रदेशका धेरै स्थानहरूमा हल्का देखि मध्यम वर्षाको सम्भावना रहेको छ ।
सुदूरपश्चिम प्रदेश र कर्णाली प्रदेशका एक–दुई स्थानमा भारी वर्षा तथा कोशी प्रदेश, मधेश प्रदेश, बागमती प्रदेश, गण्डकी प्रदेश र लुम्बिनी प्रदेशका केही स्थानहरूमा भारी देखि अति भारी वर्षाको सम्भावना रहेको छ ।
यस अवधिमा भू–क्षय, पहिरो तथा गेग्रान बहावको जोखिम रहेको, शहरी तथा तराई क्षेत्रमा डुवानको जोखिम रहेको, ठूला तथा साना नदी नाला र खोलाहरूमा पानीको सतह बढ्न सक्ने, दैनिक जन–जीवन, कृषि, स्वास्थ्य, पर्यटन, सडक तथा हवाई यातायात समेत प्रभावित हुन सक्ने भएकोले आवश्यक सतर्कता तथा पूर्व तयारी अपनाउन सरोकारवाला तथा सर्वसाधारण सबैमा महाशाखाले आग्रह गरेको छ ।
