ऊर्जा खबर
काठमाडाैं । पेट्रोलियम निर्यात गर्ने देशहरूको साझा संस्था (ओपेक) ले जिवाश्म इन्धनको समय सकिँदै जाँदा पेट्रोलियम पदार्थमाथिको निर्भरता घटाउन ऊर्जामा रुपान्तरणको विकल्प नभएको बताएको छ । संयुक्त राष्ट्रसंघीय जलवायु परिवर्तनसम्बन्धी संरचना महासन्धीका पक्ष राष्ट्रहरूको सम्मेलन (कोप २८) मा सम्बोधनका क्रममा ओपेकका महासचिव हइथाम अल गाइसले यस्तो बताएका हुन् ।
‘भविष्यमा दिगो ऊर्जाका लागि एक मात्रै समाधान वा बाटो छैन,’ ओपकको महासचिव हइथाम अल गाइसले दुबईमा जारी संयुक्त राष्ट्रसंघीय बैठकमा भने ।
‘हामीले उत्सर्जनविरुद्ध काम गर्दै आर्थिक वृद्धिसहित गरिबी न्यूनीकरण र उत्थानशील क्षमता विकास पनि सँगै गर्नुपर्ने छ । यसका लागि यथार्थपरक निर्णय लिनुपर्ने छ,’ ओपेक रिसर्च विभाग प्रमुख आयद अल कातहानीले वक्तव्यमा व्यक्त गरे ।
यसै साता कुवेती महासचिवले ओपक समूहका १३ सदस्य र १० सहयोगीलाई जीवाश्म इन्धनविरुद्ध लक्षित गर्ने कुनै पनि भाषाप्रति सक्रिय रुपमा अस्वीकार गर्न आग्रह गरेको कुरा बाहिर आएपछि शनिबार ओपेकको आलोचना भएको हो ।
कोप–२८ मा सहभागीहरुले तेल, ग्यास र कोइला जस्ता जीवाश्म इन्धनको विकल्प खोज्ने उद्देश्यका साथ विभिन्न सत्रहरुमा छलफल गरेका छन् । विश्वव्यापी तापक्रमलाई १.५ डिग्री सेल्सियसमा सीमित राख्ने विश्वव्यापी लक्ष्यलाई पूरा गर्न यी छलफललाई कोप २८ मा महत्त्व दिइएको छ ।
