डिजेल र मट्टितेलको मूल्य घट्यो 

काठमाडौं । नेपाल आयल निगमले डिजेल र मट्टीतेलको मूल्य घटाएको छ । बुधबारदेखि लागु हुने गरी डिजेल र मट्टीतेलको मूल्य घटाएको मंगलबार साँझ एक विज्ञप्ति जारी गर्दै निगमले जनाएकाे हो । निगमले दुवै थरी इन्धनकाे मूल्य प्रतिलिटर ४ रुपैयाँ घटाएको जनाएको छ । 

घटेको मूल्य अनुसार बुधबारदेखि पहिलो वर्गमा पर्ने क्षेत्रमा डिजेल र मट्टीतेलको मूल्य १६१, दोस्रो वर्गमा १६३ र तेस्रो वर्गमा १६४ रूपैयाँ कायम गरिएको छ। 

चारआली, विराटनगर, जनकपुर, अमलेखगन्ज, भलवारी, नेपालगन्ज, धनगढी र वीरगञ्ज पहिलो वर्गका क्षेत्रमा पर्छन् । त्यस्तै, दोस्रो वर्गमा सुर्खेत र दाङ पर्छन् भने काठमाडौं पोखरा र दिपायल तेस्रो वर्गका क्षेत्र अन्तर्गत पर्छन् । 

इन्डियन आयल कर्पोरेसन (आइओसी) बाट मंगलबार प्राप्त नयाँ मूल्यसूचीअनुसार डिजेल लिटरमा ३ रूपैयाँ ६३ पैसा घटेर आएको निगमले जनाएको छ। त्यस्तै पेट्रोल लिटरमा एक रूपैयाँ ५१ पैसा र एलपी ग्यास सिलिन्डरमा ९३ रूपैयाँ ६० पैसाले वृद्धि भएर आएको छ। तर यिनको भाउ यथावत नै छ।

मूल्य वृद्धि भएर आए पनि उपभोक्ताको हितलाई मध्यनजर गर्दै उद्योग, वाणिज्य तथा आपूर्ति मन्त्रालयको निर्देशन बमोजिम पेट्रोल र ग्यासको भाउ नबढाइएको निगमले विज्ञप्तिमार्फत जनाएको छ।