ऊर्जा खबर
काठमाडौँ । नेपाल आयल निगमले खाना पकाउने ग्याससहित पेट्रोलियम पदार्थको मुल्य बढाएको छ । निगमले इन्डियन आयल कर्पोरेशनबाट प्राप्त मुल्य सुचीअनुसार बुधबारदेखि लागु हुनेगरी मुल्य समायोजन गरेको हो ।
पछिल्लो मुल्य समायोजनअनुसार खाना पकाउने एलपि ग्यासमा प्रतिसिलिन्डर १५ रुपैयाँले बढाएको निगमले जानकारी दिएको छ । यसैगरी, पेट्रोलमा प्रतिलिटर ४ तथा डिजेल र मट्टीतेलमा प्रतिलिटर २ रुपैयाँले मुल्य बढाइएको छ ।
बढेको मुल्यअनुसार ग्यास प्रतिसिलिन्डर अब १९१० रुपैयाँ पुगेको छ । यस अगाडी ग्यास प्रतिसिलिन्डर १८९५ रुपैयाँ थियो । त्यस्तै पेट्रोल अब पहिलो वर्गमा १६७.५० रुपैयाँ, दोस्रो वर्गमा १६९ रुपैयाँ र तेस्रोमा १७० रुपैयाँ कायम भएको छ ।
यसअघि पेट्रोल पहिलो वर्गमा १६३.५० रुपैयाँ, दोस्रो वर्गमा १६५ रुपैयाँ र तेस्रो वर्गमा १६६ रुपैयाँ थियो । त्यस्तै डिजेल र मट्टीतेल पहिलो वर्गमा १५५.५० रुपैयाँ, दोस्रोमा १५७ रुपैयाँ र तेस्रोमा १५८ रुपैयाँ कायम भएको छ । यस अघि डिजेल र मट्टीतेलको पहिलो वर्गमा १५३.५० रुपैयाँ, दोस्रो वर्गमा १५५ रुपैयाँ र तेस्रो वर्गमा १५६ रुपैयाँ कायम गरिएको थियो ।
निगमकाअनुसार इन्डियन आयल कर्पोरेशनले पेट्रोल र डिजेलमा प्रति लिटर क्रमशः ४.५३ रुपैयाँ र २.३२ रुपैयाँले तथा खाना पकाउने एलपि ग्याँस १५.७८ रुपैयाँ बढाएर पठाएको थियो ।
