दिलबहादुर केसी
काठमाडौं । दोलखामा सञ्चालनमा रहेको ४५६ मेगावाटको माथिल्लो तामाकोसी जलविद्युत आयोजनाको विद्युत प्रवाह हुने गोंगर-खिम्ती प्रसारण लाइनको ४० नम्बर टावर बांङ्गिएको छ । जिल्लाकाे कालिञ्चोक गाउँपालिका वडा नम्बर ३ सिंगटी अस्पतालभन्दा केही माथि रहेको २२० केभी लाइनको टावर बांङ्गिएको हो ।
अविरल वर्षाले जमिनको सतह बगेपछि टावरमा समस्या परेको आशंका गरिएको छ । टावर बांङ्गिएपछि त्यसको अध्ययनका लागि प्राविधिक टोली पठाएको अप्पर तामाकोसी हाइड्रो पावर कम्पनी लिमिटेडका प्रमुख कार्यकारी अधिकृत विज्ञानप्रसाद श्रेष्ठले बताए । यही लाइनबाट माथिल्लो तामाकोसीको विद्युत खिम्ती सबस्टेसनमा जोडेर ढल्केबर र काठमाडौंमा प्रसारण भइरहेको छ ।
‘बाहिरबाट हेर्दा ठूलो समस्या नदेखिए तापनि त्यसको अध्ययनका लागि परामर्शदाता सहितको विज्ञ टोली स्थलगत रुपमा पठाएको छ’, उनले भने, ‘अध्ययन प्रतिवेदनपछि मात्र के कस्तो असर पर्छ भन्ने देखिनेछ ।’
२ वर्षअघि पनि यही टावर रहेको जमिन बगेपछि टावर बांङ्गिएको थियो । त्यसबेला प्रसारण लाइन निर्माणकै चरणमा रहेकाले त्यसलाई भत्काएर नयाँ ठड्याएको थियो । त्यस क्षेत्रमा वर्षातको पानी कटाउने उचित निकासको ठाउँ नहुँदा जमिन बग्ने समस्या रहेको छ । टावर सार्नु पर्ने वा पुनः भत्काएर नयाँ बनाउन भने आयोजनालाई करोडौ घाटा पर्न सक्छ । अहिले दैनिक आयोजनाले २ करोड ५० लाखको विद्युत विक्री गर्दै आएको छ ।
