ऊर्जा खबर
काठमाडौं । जलविद्युत आयोजनाहरूले विस्फोटक पदार्थ एक अर्काको सरसापटी लिन सक्ने भएका छन् । नेपाली सेना र स्वतन्त्र ऊर्जा उत्पादकहरूको संस्था, नेपाल (इपान) बीच आइतबार आवश्यक परेमा ऊर्जा परियोजनाहरूले विस्फोटक पदार्थ एक–अर्को आयोजनाबाट सरसापटी लिन सक्ने सहमति भएको हो ।
आइतबार (चैत २६ गते) पूवार्धार परियोजनाको लागि अत्यावश्यक विस्फोटक पदार्थको व्यवस्थापनबारे छलफल गर्दै यस्तो सहमति गरेका हुन् । यसअघि परियोजनामा विस्फोटक पदार्थ अभाव भएमा अर्को परियोजनाबाट सापटी लिएर चलाउने व्यवस्था थिएन । जसले गर्दा आयोजनाको विस्फोटक पदार्थ नआएसम्म काम ठप्प हुने गरेको थियो ।
यस्तो समस्या समाधानको लागि इपानले लामो समयदेखि नेपाली सेनासँग पहलकदमी गर्दै आएको थियो । यस्तो समस्या आयोजनाहरूलाई परेको भए तत्कालै आफ्नो आयोजना नजिकको नेपाली सेनाको कार्यालयमा विवरण उपलब्ध गराएमा समस्याको हल गरिदिनेबारेमा पनि सेनाले सहमति जनाएको छ ।
छलफलमा विस्फोटक पदार्थको ढुवानी र भण्डारणमा थप सहज बनाउन सेनाले सहजीकरण गर्ने सहमति भएको छ । छलफलमा इपानका तर्फबाट सचिव बलराम खतिवडा र कोषाध्यक्ष आनन्द चौधरी सहभागी थिए ।
