ऊर्जा खबर
काठमाडौं । प्रधानमन्त्री पुष्पकमल दाहालले आगामी एक वर्षभित्र शतप्रतिशत जनता कहाँ विद्युत् पुर्याइने बचनबद्धता व्यक्त गरेका छन् । आज (पुस २६ गते) प्रतिनिधिसभामा प्रधानमन्त्रीको विश्वासको मत माग्ने क्रममा उनले यस्तो प्रतिबद्धता व्यक्त गरेका हुन् ।
प्रधानमन्त्री दाहालले संसदमा आफ्ना बाचाहरू राख्दै भनेका छन्, ‘५ वर्षमा विद्युत् उत्पादन ६५०० मेगावाट र प्रतिव्यक्ति विद्युत् खपत ७०० किलोवाट घन्टा पुर्याइने लक्ष्य सरकारले लिनेछ । विद्युत् महसुल समायोजन गर्दै एक वर्षभित्रै शतप्रतिशत नागरिक कहाँ विद्युत् पुर्याइनेछ ।
विद्युत् उत्पादन र निर्यातमार्फत आर्थिक वृद्धिदर बढाइने पनि प्रधानमन्त्रीले बताएका छन् । साथै, इन्धनमाथिको परनिर्भरता घटाइने उनको प्रतिबद्धता रहेको छ । गार्हस्थ उपभोक्ताका लागि बर्खामा मासिक ५० युनिट र हिउँदमा ३० युनिट विद्युत् निशुल्क उपलब्ध गराइने पनि उनले बाचा गरे । जुन, माओवादी केन्द्रको गत मंसिरमा सम्पन्न प्रतिनिधिसभा र प्रदेशसभाको निर्वाचनको घोषणापत्रमा समेत उल्लेख छ ।
आगामी ३ वर्षभित्र सतह तथा भूमिगत सिँचाइबाट तराईको थप ३ लाख हेक्टर जमिनमा सिँचाइ पुर्याइने समेत प्रधानमन्त्रीको प्रतिबद्धता छ । सिँचाइको बिजुली महसुलमा थप छुट दिइने जनाइएको छ । अहिले तराई सिँचाइको महसुल प्रतियुनिट २.२५ रुपैयाँ रहेको छ भने रातीको समयमा प्रतियुनिट २ रुपैयाँमात्र छ ।
