४१ मेगावाटको संखुवा खोला निर्माण गर्न वित्तीय संस्थाहरूबाट ६ अर्ब लगानीको जोहो

काठमाडौँ । गुँरास हाइड्रोपावर लिमिटेडले संखुवासभा र भोजपुर जिल्लामा निर्माण गर्ने ४१.०६ मेगावाटको संखुवा खोला जलविद्युत् आयोजना निर्माणका लागि विभिन्न वित्तीय संस्थाहरूले ६ अर्ब रुपैयाँ भन्दा बढी लगानी गर्ने भएका छन् ।

उक्त आयोजनामा हुने लगानीका विषयमा आज (सोमबार) कम्पनी र बैंकहरूबीच सम्झौता हुँदैछ । आयोजनामा सिटिजन्स बैंकको नेतृत्वमा विभिन्न बैंकहरूले ६ अर्ब १५ करोड रुपैयाँ लगानी गर्ने टुंगो लागेको कम्पनीले जानकारी दिएको छ ।

कूल ८ अर्ब २० करोड रुपैयाँ लागत अनुमान गरिएको आयोजनमा कम्पनीका संस्थापकहरूले २ अर्ब ५ करोड रुपैयाँ लगानी गर्नेछन् । नदी प्रवाहमा आधारित यो आयोजनाको निर्माण २०८५ सम्म  पूरा गर्ने लक्ष्य राखिएको छ ।

आयोजनाका सबै पूर्वाधार संखुवा नदीको दाहिने किनार सिलिचोङ गाउँपालिका-१ मा रहने छन् । आयोजनाद्वारा उत्पादित बिजुली खरिदका लागि नेपाल विद्युत प्राधिकरणसँग २०८० फागुनमा विद्युत् खरिद सम्झौता (पीपीए) भइसकेको जनाइएको छ । आयोजनाबाट वार्षिक २४ करोड ९ लाख २९ हजार ४ सय ८६ युनिट विद्युत् उत्पादन हुने अध्ययनले देखाएको छ भने उत्पादित विद्युत् प्राधिकरणको संखुवासभास्थित २२० केभी शीतलपाटी सबस्टेसनमा लगेर जोडिनेछ ।