ऊर्जा खबर
काठमाडौं । रामेछापको उच्च हिमाली क्षेत्रमा ५७.५ मेगावाटको नुप्चे लिखु जलविद्युत आयोजना निर्माण गरिरहेको भिजन इनर्जी एण्ड पावर लिमिटेडले ६५ लाख कित्ता साधारण सेयर निष्कासन गर्ने भएको छ । कम्पनीले आयोजना प्रभावित स्थानीय र सर्वसाधारणका लागि छुट्याएको सेयर निष्कासन गर्न लागेको हाे ।
कम्पनीले १०० रुपैयाँ मूल्य अंकित ६५ करोड रुपैयाँ बराबरको साधारण सेयर निष्कासन गरी बाँडफाँड गर्न बिक्री प्रबन्धकमा एनआईबिएल क्यापिटल लिमिटेडसँग आज (मंसिर २३ गते) सम्झौता गरेको छ । सम्झौतापत्रमा कम्पनीका तर्फबाट कार्यकारी अध्यक्ष टि.एन. आचार्य र क्यापिटलका तर्फबाट नायब महाप्रबन्धक सचिन्द्र ढुंगानाले हस्ताक्षर गरेका छन् ।
जारी पुँजीकाे १० प्रतिशतले हुन आउने ३२ लाख ५० हजार कित्ता आयोजना प्रभावित स्थानीयका लागि र बाँकी १० प्रतिशतले हुन आउने ३२ लाख ५० हजार कित्ता गरी २० प्रतिशत (६५ लाख कित्ता) काे सेयर सर्वसाधारणका लागि छुट्याइएको छ ।
कम्पनीले निर्माण गरिरहेको आयोजनाको भाैतिक हालसम्म करिब ४० प्रतिशतभन्दा बढी पूरा भएको छ । सामुहिक लगानी, सुशासन, पारदर्शिता जस्ता पक्षलाई प्राथमिकतामा राखेको हुँदा निर्माण सुरु भएको एक वर्षमै करिब आधा काम सकिएको कम्पनीले जनाएको छ ।
आयाेजनाको बाँध समुद्र सतहदेखि ३३४० मिटर उचाईमा र विद्युतगृह करिब २६०० मिटरमा निर्माण भइरहेको छ । कम्पनीका अनुसार नुप्चेको छाँगे र लिखु खोलाको गोण्डाखर्कमा आयोजनाको बाँध निर्माण भइरहेको छ । यस्तै, ८.२ किलोमिटर सुरुङ र १.६ किलोमिटर लामो पेनस्टक पाइप निर्माण हुनेछ ।
“राष्ट्रको समृद्धिको लागि ऊर्जा” भन्ने नाराका साथ विभिन्न पेशाकर्मी र अनुभवी व्यक्तित्वहरू एकजुट भएर स्थापना गरिएकाे कम्पनीले संस्थागत सुशासन तथा संस्कृतिलाई व्यवहारमै उच्च प्राथमिकतामा राख्दै सोही अनुसार अघि बढिरहेको छ । कम्पनीले ISO 9001:2015 प्रमाणपत्र समेत प्राप्त गरेको छ ।
कम्पनीले ऊर्जा उत्पादन गर्ने कम्पनीहरूमा लगानी गर्ने (पानी, वायु, सौर्य ऊर्जा, बायोग्यास जस्ता वैकल्पिक ऊर्जा स्राेतहरूको प्रयोग गरेर साना वा मझौला आयोजनाहरू मार्फत) र ऊर्जा सम्बन्धित परियोजनाहरू आफैं निर्माण गर्ने गर्दछ ।
