न्यादी हाइड्रोपावरको १ करोड २७ लाख ९५ हजार कित्ता शेयरको 'लक–इन' अवधि सकिँदै

काठमाडौँ । न्यादी हाइड्रोपावर लिमिटेडको १ करोड २७ लाख ९५ हजार कित्ता शेयरको लक–इन अवधि एक महिनापछि समाप्त हुने भएको छ । कम्पनीका अनुसार २०७८ साल कात्तिक ५ गते सर्वसाधारण शेयरको अन्तिम बाँडफाँट गरिएको थियो । उक्त मितिले शेयरको ३ वर्षको लक–इन अवधि समाप्त हुन लागेको हो । 

यस्तो शेयर मध्ये संस्थापक शेयरधनीको नाममा रहेको १ करोड ९ लाख ५० हजार कित्ता, संस्थापक शेयरधनीका कर्मचारीहरूको नाममा रहेको ३ लाख कित्ता, कम्पनीका कर्मचारीहरूका नाममा रहेको ४५ हजार कित्ता रहेको छ । त्यस्तै, अति प्रभावित स्थानीयवासीको नाममा ५ लाख कित्ता र प्रभावित स्थानीयको नाममा १० लाख कित्ता रहेको छ । लक–इन अवधि सकिएपछि यस्तो शेयरको खरिद तथा बिक्री गर्न पाइने छ । 

कम्पनीले लम्जुङको मस्र्याङ्दी गाउँपालिका–६ बाहुनडाँडास्थित न्यादी खोलाको पानीबाट सञ्चालन हुने गरी ३० मेगावाटको नदी प्रवाहमा आधारित जलविद्युत् केन्द्र सञ्चालन गरिरहेको छ । यो जलविद्युत् केन्द्र २०७९ साल वैशाख २७ गतेदेखि सञ्चालमा आएको हो ।