ऊर्जा खबर
काठमाडौं । चिलिमे जलविद्युत कम्पनी लिमिटेडको गत आर्थिक वर्षमा खुद नाफा घटेको छ । कम्पनीको गत आर्थिक वर्ष २०७७/७८ मा कमाउने नाफा घटेको हो ।
गत आर्थिक वर्षमा ७० करोड १८ लाख ३४ हजार रुपैयाँ खुद नाफा कमाएको कम्पनीले जनाएको छ । कम्पनीका अनुसार अघिल्लो वर्ष २०७६/७७ को सोही अवधिको तुलनामा ४ करोड ३७ लाख ५६ हजार रुपैयाँले कम हो । अघिल्लो वर्ष ७४ करोड ५५ लाख ९० हजार रुपैयाँ नाफा गरेको थियो ।
विद्युत बिक्री आम्दानी घटेका कारण यसको असर खुद नाफामा परेको हो । समीक्षा अवधिमा कम्पनीले विद्युत बिक्रीबाट १ अर्ब १२ करोड ८० लाख ५२ हजार रुपैयाँ आम्दानी गरेको छ । अघिल्लो वर्ष १ अर्ब १४ करोड ७ लाख ३९ हजार रुपैयाँ आम्दानी गरेको थियो ।
जलविद्युत केन्द्रमा जडित विभिन्न उपकरणहरु तथा सफ्टवेयरमा समय सापेक्ष सुदृढिकरण गर्दा पावर प्लान्ट बन्द गर्नु परेको र चिलिमे खोलामा पानीको बहावमा कमी आएका कारण विद्युत बिक्री आम्दानी घटेको कम्पनीले जनाएको छ ।
नाफासँगै कम्पनीको प्रतिसेयर आम्दानी पनि घटेको छ । यो अवधिमा कम्पनीको प्रतिसेयर आम्दानी घटेर ११.१७ रुपैयाँ रहेको छ । कम्पनीको प्रतिसेयर नेटवर्थ १६१.४० रुपैयाँ रहेको छ ।
कम्पनीको रसुवामा २२.१ मेगावाटको चिलिमे जलविद्युत आयोजनाले विद्युत उत्पादन गरीररहेको छ । अहिले कम्पनीले सहायक कम्पनीमार्फत २ सय ७० मेगावाटका ४ जलविद्युत आयोजना निर्माण गरिरहेको छ । १४.८ मेगावाटको माथिल्लो सान्जेन, ४२.५ मेगावाटको सान्जेन, १ सय ११ मेगावाटको रसुवागढी र १ सय २ मेगावाटको मध्यभोटेकोसी जलविद्युत आयोजना निर्माणाधीन छन् ।
