ऊर्जा खबर
काठमाडौं । चीनले थ्री गर्जेजपछि १६ हजार मेगावाटको अर्को ठूलो जलाशय जलविद्युत आयोजना निर्माण गरिरहेकाे छ । जिन्सा नदी बेसिनमा निर्माणाधीन विश्वकै दोस्रो ठूलो बैहेतान जलाशय आयोजना अबकाे ४ महिनामा सञ्चालनमा आउँदैछ ।
४ वर्षअघि निर्माण सुरु भएको जलाशय आयोजनाको पहिलो युनिट आगामी जुलाई १ बाट सञ्चालनमा आउन लागेकाे हाे । १ हजार मेगावाटको पहिलो युनिट सञ्चालनमा ल्याउन आयोजनाको जलाशयमा पानी भर्न सुरु गरिएको सिनो हाइड्रो इन्जिनियरिङ ब्युरो ८ कम्पनीलाई उदृत गर्दै अन्तर्राष्ट्रिय सञ्चार माध्यमहरूले जनाएका छन् ।
आयोजनाको गेट बन्द गरेपछि जलाशयमा पानीको सतह ६ सय ६५ मिटरबाट बढ्न थालेको छ । मध्य जुनसम्ममा जलाशयमा पानीको सतह ७ सय ७५ मिटर पुग्ने प्रक्षेपण गरिएको छ ।
८ सय २५ मिटर क्षमता रहेको जलाशयमा अगस्टदेखि सेप्सेम्बरसम्मको अवधिमा पानीको सतह ८ सय मिटर हाराहारीमा पुग्नेछ । सेप्टेम्बरपछि भने जलाशय पुरै भरिएर सामान्य अवस्थामा आइपुग्नेछ ।
जिन्सा नदी बेसिनको ९१ प्रतिशत पानी भण्डारण गर्न सकिनेगरी जलाशय निर्माण गरिएको छ । यो जलाशय याङट्जे नदीमा बर्खामा आउने बाढी नियन्त्रणका लागि पनि महत्त्वपूर्ण हुने बताइएको छ ।
पहिलो युनिट सञ्चालनमा आएपछि बाँकी युनिट पनि सञ्चालन गर्दै जाने सिनो हाइड्रो इन्जिनियरिङले जनाएको छ । आयोजनाको विद्युतगृहमा १ हजार मेगावाट क्षमताका १६ वटा उत्पादन युनिट हुनेछन् ।
जलाशय आयोजना पूर्णरूपमा सञ्चालनमा आएपछि वार्षिक ६ कराेड २ लाख ४० हजार गिगावाट घन्टा विद्युत उत्पादन हुनेछ । यो जलाशय आयोजनालाई चीनको पूर्व पश्चिम प्रसारण प्रणालीको मेरुदण्डका मानिएको छ । साथै, बर्खाको बाढी नियन्त्रणमा पनि जलाशय आयोजना महत्वपूर्ण हुनेछ ।
जलाशय आयोजनाका सबै युनिट सञ्चालनमा आएपछि कार्बन उत्सर्जन घटाउने लक्ष्य पूरा हुने चीनको दाबी छ । विश्वकै ठूलो २२ हजार ५ सय मेगावाटको थ्री गर्जेज जलाशय आयोजना पनि चीनमा छ ।
दि ग्लाेबल टाइम्सकाे सहयाेगमा अनुवाद
