ऊर्जा खबर
काठमाडौं । स्वतन्त्र ऊर्जा उत्पादकहरूको संस्था नेपाल (इपान) र एक गैरसरकारी संस्था शेषकान्त फाउन्डेशनबीच साझेदारी सम्झाैता भएको छ । जलविद्युत आयोजना निर्माण, सञ्चालन तथा मर्मत सम्भारका लागि आवश्यक दक्ष जनशक्ति उत्पादन गर्न मंगलबार यस्ताे सम्झाैता भएकाे हाे ।
सम्झाैतामा इपानका अध्यक्ष कृष्णप्रसाद आचार्य र फाउन्डेसनका अध्यक्ष विश्वेश्वरप्रसाद ढकालले हस्ताक्षर गरे । सम्झाैता अनुसार फाउन्डेसनले जलविद्युत क्षेत्रका लागि आवश्यक दक्ष जनशक्ति उत्पादन तथा विकासमा इपानसँग समन्वय तथा सहकार्य गर्नेछ ।
धादिङको धुनिबेँसी नगरपालिकामा सञ्चालित फाउन्डेसनमार्फत जर्मन प्राविधिक शिक्षालयबाट जलविद्युत क्षेत्रले खोजे जस्तो प्राविधिक जनशक्ति उत्पादन गर्ने ढकालले बताए । ‘ऊर्जा क्षेत्रमा देखिएको दक्ष प्राविधिकको अभाव अब यस फाउन्डेसनले पूरा गर्नेछ,’ उनले भने, ‘विदेशी भूमिबाट प्राविधिक ल्याउन बढी खर्च र समय लाग्छ । नेपालमै उत्पादन गर्न सके खर्च र समय दुवै जोगिन्छ ।’
आगामी ६ महिनाभित्र जलविद्युत क्षेत्रका लागि जनशक्ति तालिम सुरु गरिने पनि ढकालले बताए । उनका अनुसार जलविद्युत प्रवद्र्धकसँग सहकार्य गरी चाहिएअनुसार पाठयक्रम डिजाइन गरी तालिम दिइने छ ।
तालिमका लागि आवश्यक उपकरण जर्मनस्थित स्टेल्वा हाइड्रो कम्पनीले प्रदान गर्ने जनाइएको छ । विदेशमा सिकेको ज्ञान र पुँजी स्वदेशमै लगानी गर्ने उदेश्यले फाउन्डेसन निर्माण गरिएको बताइएको थियो । शिक्षालयमा अहिले २० जनाले वैल्डिलङको तालिम लिइरहेका छन् । होस्टल निर्माण पूरा नभएकाले अहिले स्थानीयलाई प्राथमिकतामा राखी तालिम प्रदान गरिएको छ ।
निर्माणधीन होस्टल, विद्यालयभवन र उपकरण आयातसहित १४ करोड रुपैयाँखर्च भइसकेको फाउन्डेसनले जानकारी दियो । विदेशी भूमिमा बिनासीप युवाहरू जाने गरेको र यसले ठूलो समस्या निम्त्याइरहेको छ । रोजगारी गर्न विदेश जाने युवालाई पनि फाउन्डेसनले सीप सिकाउने योजना छ ।
