सरुवा भई रमाना नलिने कर्मचारीकाे तलब र हाजिरी रोक्का गरिने 

काठमाडौं । नेपाल विद्युत प्राधिकरणले प्रधान कार्यालयका विभिन्न निर्देशनालय, प्रादेशिक तथा प्रदेश डिभिजन कार्यालय र विभागबाट सरुवा/पदस्थापन भएका कर्मचारीलाई २४ घन्टाभित्र रमाना लिन निर्देशन दिएको छ । प्राधिकरणले पहिले नै सरुवा/पदस्थापन भई नयाँ कार्यालयमा हाजिर हुन हटेर गर्ने कर्मचारीलाई समय तोकेर रमाना लिन निर्देशन दिएको हो ।

प्राधिकरण प्रशासन निर्देशनालयले सूचना जारी गरी २४ घन्टाभित्र सरुवा/पदस्थापन भएको कार्यालयमा उपस्थित नहुने कर्मचारीको यसै महिनाबाट तलब रोक्का गर्ने चेतावनी समेत दिएको छ । तोकिएको अवधिभित्र रमाना नलिएमा कर्मचारीको हाजिरी मेसिनमा हाजिर गर्न राेक लगाइने पनि सूचनामा जनाइएको छ ।

विभिन्न निर्देशनालय, प्रादेशिक तथा डिभिजन कार्यालय एवं विभागबाट मासिक तथा त्रैमासिक काजमा खटिइ हालसम्म फिर्ता नआउने कर्मचारीलाई पनि २४ घन्टाको अल्टिमेट दिइएको छ । काजमा गई हालसम्म पनि फिर्ता नभएका कर्मचारीलाई यो अवधिभित्र फर्किन निर्देशनालयले आग्रह गरेको छ ।

काज अवधि समाप्त भई कार्यरत रहेको कार्यालयमा फिर्ता हुन अटेर गर्ने कर्मचारीको हकमा पनि यसै महिनाबाट तलब तथा काज खटिई गएको कार्यालयमा हाजिरमा रोक लगाउने चेतावनी निर्देशनालयले दिएको छ ।

अब मासिक तथा त्रैमासिक काजमा खटाउँदा एउटा आर्थिक वर्षमा ३ महिनासम्म मात्र खटाउन सकिने सूचनामा उल्लेख छ । काज काजमा पठाउने अधिकारीले कर्मचारी कति समयसम्म काजमा बसेको छ ? भन्ने यकिन गरी थप काज स्वीकृत गराउनु पर्ने भएको छ ।

काज दिने सम्बन्धमा तोकिएको व्यवस्था कार्यान्वयन नगर्ने/नगराउने पदाधिकारी तथा कर्मचारीलाई विभागिय कारवाहीका लागि प्रस्ताव गरिने समेत निर्देशनालयको सूचनामा जनाइएको छ ।