सुपर माइ हाइड्रोको सेयर आवेदन दिने आज अन्तिम दिन

काठमाडौं । सुपर माई हाइड्रो पावर लिमिटेडको सेयर आवेदन दिने आज (बिहीबार) अन्तिम दिन हो । कम्पनीले सर्वसाधारणका लागि निष्कासन गरेको सेयर आवेदन अवधि आज साँझ ५ बजेबाट सकिन लागेको हो ।

कम्पनीले माघ २३ (सोमबार) गतेदेखि सर्वसाधारण्का लागि जारी पुँजी ५० करोड रुपैयाँको १० प्रतिशत सेयर बिक्री खुल्ला गरेको थियो । सय रुपैयाँ अंकित ५ करोड रुपैयाँ बराबरको ५ लाख कित्ता सेयरमध्ये १० प्रतिशत अर्थात ५० हजार कित्ता सेयर वैदेशिक रोजगारीमा गएका नेपाली नागरिकका लागि र ५ प्रतिशत हुन आउने अर्थात २५ हजार कित्ता सेयर सामुहिक लगानी कोषका तथा २ प्रतिशत हुन आउने अर्थात १० हजार कित्ता सेयर कम्पनीका  कर्मचारीको  लागि सुरक्षित गरिएको छ ।

बाँकी रहेको ४ लाख १५ हजार कित्ता सेयर सर्वसाधारणका लागि निष्कासन गरेको कम्पनीले जनाएको छ । सर्वसाधारणले न्यूनत्तम १० कित्ता देखि २० हजार कित्ता सम्म आवेदन दिन पाउनेछन् ।

कम्पनीको सेयर निष्कासन गरी बाँडफाँड गर्न सानिमा क्यापिटल लिमिटेडलाई बिक्री प्रबन्धक तोकिएको छ । कम्पनीले इलाममा ७.८ मेगावाटको सुपर माई जलविद्युत आयोजना सञ्चालनमा छ ।