ऊर्जा खबर
काठमाडौं । सिद्धि हाइड्रो पावर कम्पनी लिमिटेडले १० मेगावाट विद्युत राष्ट्रिय प्रसारण प्रणालीमा जाेड्न १६ किलोमिटर लामो प्रसारण लाइन निर्माण गर्ने भएको छ । कम्पनीले निर्माणाधीन सिद्धि खोला जलविद्युत आयोजनाको विद्युत प्रवाह हुने प्रसारण लाइन निर्माण गर्ने भएकाे हाे ।
प्रवर्द्धक कम्पनीले इलाम जिल्लाको रोङ गाउँपालिकामा निर्माणाधीन आयोजनाको स्वीचयार्डदेखि सोही जिल्लाको सुर्योदय नगरपालिकास्थित नेपाल विद्युत प्राधिकरणकाे फिक्कल सबस्टेनसम्म ३३ केभी सिंगल सर्किट प्रसारण लाइन निर्माण गर्नु पर्ने देखिएकाे हाे । विद्युत विकास विभागले प्रसारण लाइन निर्माण गर्न कम्पनीको नाममा अनुमति दिने प्रकृया अन्तिम चरणमा पुर्याएको छ ।
विभागले विद्युत ऐन २०४९ को दफा ४ को व्यवस्था अनुसार विद्युत नियमावली २०५० को नियम १५ बमोजिम कम्पनीलाई अनुमतिपत्र दिन लागेको हो । कम्पनीलाई अनुमति पत्र दिन विभागले ३५ दिने सार्वजनिक सूचना जारी गरेको छ ।
विभागले अनुमतिपत्र दिनुअघि प्रसारण लाइन निर्माण तथा सञ्चालन गर्दा पर्न सक्ने प्रतिकुल असरबारे सम्बन्धित सरोकारवालासँग राय/सुझाव मागेको छ । विभाग तथा कम्पनीको कार्यालयमा आइपुग्ने गरी सराेकारवालाबाट राय/सुझाव मागिएको हाे ।
निर्माणाधीन आयोजनाको स्वीचयार्डदेखि फिक्कल सबस्टेसनसम्मको लाइनमा ३ सय ३८ वटा टावर रहनेछन् । एउटा टावरदेखि अर्को टावरसम्मको दुरी ५० देखि ६० मिटर हुनेछ । कम्पनीले प्रसारण लाइनको काम सुरु गरेको १७ महिनाभित्र पूरा गरी सञ्चालनमा ल्याइसक्नु पर्नेछ ।
