ऊर्जा खबर
काठमाडौं । काठमाडौं ५ बाट नवनिर्वाचित सांसद तथा कांग्रेस नेता प्रदीप पौडेलले नाङ्गो तार व्यवस्थापनका लागि पहल सुरु गरेका छन् । बुधबार (मंसिर २१ गते) नेपाल विद्युत प्राधिकरणका कार्यकारी निर्देशक कुलमान घिसिङसँग भेटेर काठमाडौं ५ सहित उपत्यकामा रहेको विद्युतीय तारको समस्या हल गर्न आग्रह गरेका हुन् ।
भेटमा उनले सबै सडकका पोललाई यथासक्य चाँडो प्रतिस्थापन गरी भूमिगत गर्न, प्रतिस्थापन भएका ठाउँमा सडकमा पारिएका खाल्डा पुर्न र सम्पूर्ण नाङ्गो तारलाई कालो तारले प्रतिस्थापन गर्न आग्रह गरेका छन् ।
यस्तै, घिसिङले कतिपय स्थानमा काम भइरहेको र कतिपय स्थानमा काम गर्न अवरोध सिर्जना भएको जानकारी गराए । मुख्य सडक क्षेत्रमा काम भइरहेको र भित्री सडकहरूमा साँगुरो बाटो र ढल एकै ठाउँमा भएका कारण काम गर्न अफ्ठयारो रहेको उनको भनाइ थियो । तर, तीन वर्ष भित्रमा यो काम सम्पन्न हुने घिसिङले जानकारी दिए ।
निर्देशक घिसिङले समस्या हल गर्न काठमाडौंमा २० ओटा सबस्टेसन निर्माण गर्ने जस अन्तर्गत टोखा नगरपालिकामा पनि एउटा सबस्टेसन निर्माण हुने जानकारी गराएका थिए ।
