ऊर्जा खबर
काठमाडौं । साझा यातायातका विद्युतीय बस उपत्यकाका सडकमा गुड्न थालेका छन् । २०७८ चैतमा नेपाल भित्र्याएको ३ वटा बिजुली बस आज (बिहीबार) देखि गुड्न थालेका हुन् ।
बिहीबार साझा यातायातको कार्यालय पुल्चोकमा औपचारिक रुपमा उद्घाटन गरी बस सञ्चालन गरिएको छ । तीन वटा बसमध्ये दुई वटा रत्नपार्क, ठमेल, नयाँ बसपार्क हुँदै एअरपोर्टको रुटमा चल्ने छ भने अर्को बस लगनखेल, रत्नपार्क हुँदै बूढानीलकण्ठ रुटमा चल्ने साझाले जनाएको छ ।
तीन वटै बसमा चालक र परिचालकमा महिला छन् । अपाङ्गतामैत्री बसमा ह्वीलचियरसहित सजिलै चढ्न सकिने व्यवस्था छ । बसमा सीसीटीभी, टीभी, वाइफाई, डस्बिन र बस रोक्न विशेष खालको बटमको सुविधा छ । बसमा १६१.२८ किलोवाटको ब्याट्रीको प्रयोग गरिएको छ । बस ४५ किलोवाटको चार्जमा ५ घण्टा चार्ज गर्दा २ सय किलोमिटर गुड्न सक्छ ।
चीनबाट ल्याउन लागिएको ४० मध्ये पहिलो चरणमा ३ वटा बस ल्याइएको हो । प्रतिबस करिब डेढ करोड रुपैयाँ परेको बस चीनको नानजिंगस्थित सीएचटीसीएचओ कम्पनीले तयार गरेको हो ।
