ऊर्जा खबर
.jpg)
काठमाडौं । सान्जेन जलविद्युत कम्पनीले ३६ लाख ५० हजार कित्ता साधारण सेयर निष्कासन गर्ने भएको छ । कम्पनीले रसुवाबासीका लागि छुट्याएकाे साधारण सेयर निष्कासन गर्ने प्रक्रिया अघि बढाएकाे हो ।
निर्माणाधीन ४२.५ मेगावाटको सान्जेन र १४.८ मेगावाटको माथिल्लो सान्जेन जलविद्युत आयोजना प्रभावित स्थानीयका लागि छुट्याएको सेयर निष्कासन गर्न लागिएको कम्पनीले जनाएको छ । कम्पनीका अनुसार प्रतिकित्ता सय रुपैयाँमा अंकित ३६ करोड ५० लाख रुपैयाँ बराबरको साधारण सेयर निष्कासन गर्न लागिएको छ ।
कम्पनीले सेयर निष्कासन अनुमतिका लागि नेपाल धितोपत्र बोर्डमा आवेदन दिएको छ । बोर्डले अनुमति दिएलगतै सेयर निष्कासन गरी बाँडफाँड गरिनेछ । कम्पनीले सेयर निष्कासन गरी बाँडफाँड गर्न सिटीजन इन्भेसमेन्ट ट्रस्टलाई बिक्री प्रबन्धक तोकेको छ ।
कम्पनीले यसअघि कर्मचारी संचय कोषमा रकम जम्मा गर्ने संचयकर्ता, संस्थापक संगठित संस्थाका कर्मचारी, ऋणदाता संस्थाका कर्मचारी र सर्वसाधारणका लागि सेयर निष्कासन गरी बाँफफाँड गरिसकेकाे छ । कम्पनीकाे सेयर दाेस्राे बजारमा सूचीकृत भइ काराेबार समेत भइरहेकाे छ । रसुवाबासीले सेयर खरिदका लागि आवेदन दिन थप समय मागेकाले सेयर निष्कासन कार्य पछि सारिएकाे हाे ।
कम्पनीले निर्माण गरिरहेका आयोजनाको काम अन्तिम चरणमा पुगेको छ । माथिल्लो सान्जेनको मुख्य सुरुङ र सर्जट्याङ खन्ने कार्य सम्पन्न भई अन्तिम चरणका कामहरू भइरहेका छन् । विद्युतगृहमा उपकरण राखिने संरचनाहरुको निर्माण सम्पन्न भइसकेको छ । सान्जेनको भौतिक प्रगति ८३ प्रतिशत छ ।
दुवै आयोजनाका इलेक्ट्रोमेकानिकल उपकरणहरूको उत्पादन, जडान, परीक्षण सञ्चालनको ठेक्का पाएको कम्पनीका प्राविधिकहरु चीनबाट नेपाल आउन नसक्दा करिब २ वर्षदेखि काम रोकिएको छ । नेपाल विद्युत प्राधिकरणका अनुसार अब चिनियाँ तथा नेपाली प्राविधिकहरूबाट विद्युतगृहमा उपकरण जडान कार्य सुरु गरिनेछ ।
यी आयोजनाको विद्युत चिलिमे हब सबस्टेसनसम्म पुर्याउन आवश्यक प्रसारण लाइन निर्माण भइरहेको छ । प्रसारण लाइनका टावरहरू निर्माण भइसकेका छन् । अब तार टाँग्न बाँकीे छ ।
.jpg)