ऊर्जा खबर
काठमाडौं । नेपाल विद्युत प्राधिकरणको चितवन भरतपुरस्थित बसेनीमा रहेको १३२/११ केभी भरतपुर सबस्टेसन मर्मत सकिएपछि पूर्ण क्षमतामा सञ्चालन भएको छ । समस्याग्रस्त २ वटै पावर टान्सफर्मर बदली गरी नयाँ जडान गरेपछि आइतबार साँझबाट सबस्टेसन पूर्ण क्षमतामा सञ्चालनमा आएको हो ।
सबस्टेसन पूर्ण क्षमतामा सञ्चालनमा आएसँगै भरतपुर क्षेत्रको विद्युत आपूर्ति नियमित भएको छ । माग व्यवस्थापन सहज भएपछि प्राधिकरणले उद्योगहको विद्युत आपूर्ति पनि सुचारु गरेको छ । आइतबार साँझबाट नै औद्योगिक क्षेत्रमा आपूर्ति नियमित गरिएको प्राधिकरणले जनाएको छ ।
सबस्टेसनमा जडान भएको एउटा टान्सफर्मर कात्तिक १३ गते पड्किएको थियो । यो टान्सफर्मर पड्किँदा अर्को टान्सफर्मरबाट आपूर्ति व्यवस्था मिलाइएकोमा त्यसको ३ दिनपछि १६ गतेबाट यसमा समेत समस्या आउँदा भरतपुर क्षेत्रको विद्युत आपूर्ति अवरुद्ध हुन पुगेको थियो ।
प्राधिकरणले बिग्रिएको ट्रान्सफर्मर हटाई सबस्टेसनमा जगेडामा रहेको २२.५ एमभिएको टान्सफर्मर जडान गरी एउटाबाट लक्ष्मी पूजाको दिन घरायसी ग्राहकका लागि विद्युत आपूर्तिको व्यवस्था मिलाएको थियो । यो टान्सफर्मरबाट आपूर्ति सुचारु गर्न ३६ घन्टा लागेको थियो ।
कास्कीस्थित लेखनाथ सबस्टेसनको २२.५ एमभिएको ट्रान्सफर्मर भरतपुर ल्याएर जडान गरेपछि मात्रै सबस्टेसन पूर्ण क्षमतामा विद्युत आपूर्ति गरिरहेको हो ।
नयाँ टान्सफर्मर राखेसँगै सबस्टेसनको क्षमता ४५ एमभिए पुगेको छ । मर्मतपछि सबस्टेसन सञ्चालनमा आएपछि भरतपुर क्षेत्रका औद्योगिकसहित सबै वर्गका ग्राहकले नियमित सेवा पाइरहेको
प्राधिकरण भरतपुर वितरण केन्द्र प्रमुख प्रमुख राजीव सिंहले बताए ।
उनका अनुसार अनुसार चितवनकै १३२/११ केभी आँपटारी सबस्टेसनमा पनि १५ एमभिएको ट्रान्सफर्मर जडान कार्य सुरु गरिएको छ । यो सबस्टेसनबाट विद्युत आपूर्तिका लागि ३ वटा फिडर सञ्चालन गरिएको छ ।
तिहारको समयमै भरतपुर क्षेत्रमा विद्युत आपूर्ति बन्द भएपछि प्राधिकरणका कार्यकारी निर्देशक कुलमान घिसिङ, प्रसारण निर्देशनालयका उपकार्यकारी निर्देशक दीर्घायूकुमार श्रेष्ठसहितको टोली मर्मत स्थलमा खटिएको थियो ।
