ऊर्जा खबर
काठमाडौं । ऊर्जा, जलस्रोत तथा सिँचाइ मन्त्री शक्तिबहादुर बस्नेतले आज (आइतबार) विद्युत् विधेयक २०८० छलफलका लागि प्रतिनिधि सभा (संसद) मा पेश गर्ने भएका छन् ।
दिउँसो १ बजेदेखि बसेको संसद बैठकमा आइतबार मन्त्री बस्नेतले उक्त विधेयक पेश गर्ने कार्यसूची रहेको संसदकाे पूर्वाधार विकास समिति सचिवालयले जनाएको छ । विद्युत् ऐन २०४९ लाई परिमार्जन गर्दै विद्युत्सम्बन्धी कानुनलाई एकीकरण गर्न बनेको उक्त विधेयक संसदमा पेस गर्न लागेको हो ।
उक्त विधेयक संसदमा दर्ता भएपछि ७२ घण्टाभित्र सांसदहरूले अध्ययन गरी संशोधन प्रस्ताव संसदमा दर्ता गराउन पाउने छन् ।
त्यसपछि विधेयक र संशोधन प्रस्ताव संसदको विषयगत समितिमा दफावार छलफलका लागि पठाइने व्यवस्था रहेको समितिका सचिव उदयकुमार भण्डारीले बताए ।
‘समितिमा विधेयकमाथि छलफल भएपछि संसोधन प्रस्तावसहित संसदको फुल हाउसमा लगिने छ,’ उनले भने ।
नेपालमा समयसापेक्ष परिमार्जनसहितको नयाँ विद्युत् ऐनको महसुस गरी ऐन बनाउन विधेयक मस्यौता संसदमा लान सुरु गरिएको झण्डै २२ वर्ष भइसकेको छ । तर, हालसम्म नयाँ विद्युत् ऐन बन्न सकेको छैन ।
हाल संसदमा दर्ता भएको विधेयकमा रहेका कतिपय व्यवस्था निजी ऊर्जा उत्पादकहरुको हितमा नभएको भन्दै स्वतन्त्र ऊर्जा उत्पादकहरूको संस्था नेपाल (इपान) ले १२ बुँदे असहमतिसहित संशोधन प्रस्ताव पेश गरिसकेको छ ।
सरकारले उक्त विधेयक संसदमा लैजान २७ भदाैमा संसद सचिवालयमा दर्ता गरेको थियो ।
यस्ताे छ कार्यसूची
