ऊर्जा खबर
काठमाडौं । लगानी बोर्ड नेपालले स्थापानको १२ वर्षमा ऊर्जा क्षेत्रका २८ र गैर ऊर्जा क्षेत्रका १४ गरी कुल ४२ आयोजनामा १२ खर्ब ५० अर्ब रुपैयाँको लगानी स्वीकृत गरेको छ । बोर्डले आफ्नो स्थापनाको १२ औँ वार्षिक उत्सवका अवसरमा शुक्रबार आयोजना गरेको समारोहमा यस्तो जानकारी दिएको हो ।
स्वीकृति प्राप्त लगानी मध्ये विभिन्न परियोजनामा गरी कुल ५ खर्ब २५ अर्ब रुपैयाँ लगानी परिचालन भएको छ । यसबाहेक बाँकी लगानी प्रतिबद्धतामा सीमित भएको छ ।
बोर्डका अनुसार यस अवधिमा प्रतिदिन ६ हजार टन उत्पादन क्षमता रहेको होङ्सी सिमेन्ट उद्योग र दैनिक ३ हजार टन उत्पादन क्षमताको हुवासिन सिमेन्ट परियोजना व्यवसायीक सञ्चालनमा आएका छन् ।
त्यस्तै, उर्जातर्फ धरानमा वेस्टु इनर्जी परियोजना निर्माण सम्पन्न भई सञ्चालनमा आएको छ ।
९०० मेगावाटको अरुण–३ जलविद्युत् आयोजना, २१६ मेगावाटको माथिल्लो त्रिशुली जलविद्युत् आयोजना कार्यान्वयनको चरणमा पुगेका छन् । ९०० मेगावाको माथिल्लो कर्णाली र ६६९ मेगावातको तल्लो अरुण जलविद्युत् आयोजनाको परियोजना विकास सम्झौता (पिडिए) सम्पन्न भई वित्तीय व्यवस्थापन (फाइनान्सियल क्लोजर) गर्ने क्रममा छन् । यद्यपी, माथिल्लो कर्णालीको वित्तीय व्यवस्थापनमा विकासकर्ता कम्पनी जीएमआरले निकै वर्ष व्यतित गरिसकेको छ ।
त्यस्तै, ४५० मेगावाटको सेती नदी–६, ७५० मेगावाटको पश्चिम सेती जलविद्युत् परियोजना विकासका लािग भारतको एनएचपिसी लिमिटेडसँग समझदारी भएको छ । यी आयोजनाको विस्तृत परियोजना प्रतिवेदन (डिपिआर) हुने क्रममा रहेको छ ।
यस अवधिमा बोर्डले अघि बढाएका ३२७ मेगावाटको अपर मर्स्याङ्दी–२ डिपिआर तयार भई सञ्चालन भइरहेको छ भने परियोजना विकास सम्झौताका लागि तयारी भइरहेको छ ।
बोर्डका अनुसार यस अवधिमा डाबर नेपालले उत्पादन वृद्धि तथा विविधीकरणका लागि ९ अर्ब ६८ करोड रुपैयाँ पुनःलगानी गर्ने भएको छ ।
चीन–नेपाल मैत्री औद्योगिक पार्क परियोजनाका लागि पिडिए गर्न वार्ता समिति गठन गरिएको छ ।
बोर्ड अध्यक्ष प्रधानमन्त्री पुष्पकमल दाहालको उपस्थितिमा आयोजना गरिएको १२ औँ वार्षिकोत्सवका अवसरमा लगानीकर्ता, परियोजना विकासकर्ता, बोर्डका पिडिए वार्ता टोलीका सदस्यलगायतलाई सम्मान गरिएको थियो । त्यस्तै, बोर्डसँग सहकार्य गरिरहेको स्ट्यान्डर्ड चार्टर्ड बैँकलगायत निकायलाई समेत सम्मान गरिएको थियो ।
वार्षिकोत्सव समारोहमा बोर्ड सदस्यका रुपमा रहेका नेपाल सरकारका विभिन्न मन्त्रालयका मन्त्रीहरुको उपस्थिति रहेको थियो ।
