ऊर्जा खबर
काठमाडौं । दोलखामा २५ मेगावाटको सिंगटी जलविद्युत आयोजना निर्माण गरी सञ्चालन गरिरहेको सिंगटी हाइड्रो इनर्जी लिमिटेडले १ बराबर १ हकप्रद सेयर निष्कासन गर्ने भएको छ । सय रुपैयाँ दरका १ करोड ४५ लाख कित्ता सेयर निष्कासन गर्न कुमारी क्यापिटल लिमिटेडलाई निष्कासन तथा बिक्री प्रबन्धक नियुक्त गरिएको छ ।
निष्कासन सम्बन्धी सम्झौतापत्रमा सिंगटीका प्रबन्ध सञ्चालक सुदिप खड्का तथा कुमारी क्यापिटलका कामु प्रमुख कार्यकारी अधिकृत पुष्प शर्माले असार २२ गते हस्ताक्षर गरे । हकप्रद सेयर निष्कासनबाट प्राप्त रकम विभिन्न ३५ मेगावाटभन्दा बढी क्षमताका आयोजनामा लगानी गर्ने कम्पनीको योजना छ । हाल, सिंगटीको अधिकृत पुँजी २ अर्ब ९० करोड रुपैयाँ, जारी पुँजी २ अर्ब ९० करोड रुपैयाँ रहेकोमा हकप्रद सेयर निष्कासनपश्चात् कम्पनीको चुक्ता पुँजी २ अर्ब ९० करोड रुपैयाँ हुने जनाइएको छ ।
२०६७ जेठ ५ गते कम्पनी रजिष्ट्रारको कार्यालयमा प्राइभेट लिमिटेड कम्पनीको रूपमा दर्ता भई कएको सिंगटी २०७५ असार ६ गतेदेखि पब्लिक लिमिटेड कम्पनीमा परिणत भएको थियो । कम्पनीले निर्माण गरेको सिगंटी खोलाबाट २०७८ साउन १७ गतेबाट व्यापारिक उत्पादन सुरु गरेको थियो । कम्पनीका अनुसार हाल आयोजनाले कूल क्षमताको ९७ प्रतिशत विद्युत उत्पादन गरिरहेको छ ।
हकप्रद शेयर जारीबाट प्राप्त रकम अर्बिट इनर्जी प्रालिद्वारा प्रवद्र्धित २१.५ मेगावाटको सभा खोला ‘बी’ र ६.३ मेगावाटको सभा खोला ‘सि’ मा ५१ प्रतिशत र ह्याबिट्याट पावर कम्पनी प्रालिद्वारा प्रवद्र्धित ७.५ मेगावाटको हेवा ‘ए’ मा ५१ प्रतिशत लगानी गर्ने जनाइएको छ ।
सिंगटी खोलाबाट उत्पादन गरिएको सबै विद्युत नेपाल विद्युत प्राधिकरणले खरिद गर्नका लागि कम्पनी र प्राधिकरणबीच २०७० कात्तिक २७ गते र २०७४ साल मंसिर २८ गते क्रमशः १६ मेगावाट र ९ मेगावाटको विद्युत खरिद बिक्री सम्झौता (पिपिए) सम्पन्न भएको थियो ।
