अरुण भ्यालीले अरुण काबेलीको २२ लाख ३२ हजार कित्ता सेयर बिक्री गर्ने

काठमाडौं । अरूण भ्याली हाइड्रो पावर डेभलपमेन्ट कम्पनी लिमिटेडले करिब २२ लाख ३२ हजार कित्ता सेयर बिक्री गर्ने भएको छ । कम्पनीले आफुसँग रहेको अरूण काबेली पावर कम्पनी लिमिटेडको सेयर बिक्री लागेको हो ।

कम्पनीसँग रहेको अरूण काबेली पावरको २२ लाख ३२ हजार ५ सय ७० कित्ता सेयर बिक्री गर्न लागेको कम्पनीले जनाएको छ । कम्पनीका अनुसार कम्पनी तथा कम्पनीका सेयरधनीहरुको हितलाई उच्चतम प्राथमिकतामा राखी कम्पनीको वृद्धिलाई ध्यानमा राखी आवश्यकता तथा औचित्यताको आधारमा दोस्रो बजारमा बिक्री गर्ने निर्णय भएको छ ।

कम्पनीले विद्युत नियमन आयोगले जारी गरेको विद्युत सम्बन्धी कम्पनीको सेयरको सार्वजनिक निष्कासनको पूर्वस्वीकृती तथा नियमनसम्बन्धी निर्देशिका, २०७८ को दफा ११ अन्तर्गत सर्वसाधारणको जानकारीको सुचना प्रकाशित गरी सेयर बेच्न लागिएको जनाएको छ ।

कम्पनीले पाँचथर निर्माण सम्पन्न गरेको १० मेगावाटको काबेली बी–१ क्यासकेड जलविद्युत आयोजना परीक्षण सुरु गरेको छ । आयोजना सम्पन्न गर्न २ अर्ब रुपैयाँ लागत अनुमान गरिएको छ । जसमा १ अर्ब ४० करोड रुपैयाँ बैंकको ऋण लगानी हो । आयोजनामा बैंक अफ काठमाडौंको अगुवाईमा कुमारी बैंकको पनि लगानी छ ।

६० करोड रुपैयाँ स्वपुँजी लगानी हो । स्वपुँजी लगानी जुटाउन कम्पनीले हकप्रद सेयर निष्कासन गरेको छ । कम्पनीले यसअघि संखुवासभाको पिलुवा खोलामा ३ मेगावाटको जलविद्युत आयोजना निर्माण गरी विद्युत उत्पादन गरिरहेको छ ।

कम्पनीले पिलुवाको विद्युत बिक्रीबाट हुने आम्दानी सहायक कम्पनीमार्फत आधा दर्जन बढी जलविद्युत आयोजनामा लगानी गरेको छ । काबेली–‘बी’–१ क्यासकेड आयोजनामा भने कम्पनीको शतप्रतिशत लगानी छ ।