स्नातक र स्नातकोत्तर अध्ययनरत विद्यार्थीलाई निशुल्क विद्युतीय चुलो बाँडिने

काठमाडौं । वैकल्पिक ऊर्जा प्रवर्द्धन केन्द्रले लोपोन्मुख आदिवासी जनजाति र दलित बर्गका विद्यार्थीलाई निशुल्क विद्युतीय चुलो (इन्डक्सन) बाँड्ने भएको छ । केन्द्रले सरकारी शिक्षण संस्थाहरू विश्वविद्यालय तहमा अध्ययनरत विद्यार्थीहरूलाई निशुल्क विद्युतीय चुलो वितरण गर्न लागेको हो ।

काठमाडौं उपत्यका बाहीरबाट आएर घरभाडामा लिई सरकारी र सामुदायिक संस्थाहरूमा स्तातक र स्नातकोत्तर तहमा अध्ययनरत लोपोन्मुख जनजाति आदिवासी र दलित वर्गका विद्यार्थीलाई निशुल्क चुलो वितरण गर्न आवेदन माग गरिएको केन्द्रले जनाएको छ ।

केन्द्रका अनुसार बिजुलीको आन्तरिक खपत बढाउन र खाना पकाउने ग्यासलाई विद्युतीय चुलोले प्रतिस्थापन गर्न सरकारको उदेश्यलाई सहयोग पुग्ने गरी यस्तो कार्यक्रम ल्याइएको हो ।

इच्छुक विद्यार्थीले अनलाइनबाट फाराम भरी इमेलमा प्राप्त टोकन नम्बर समावेश गरेर नागरिकताको प्रमाणपत्रको प्रतिलिपि, शिक्षण संस्थाको सिफारिस र विद्यार्थीको परिचयपत्रको प्रतिलिपिका साथै लोपोन्मुख, आदिवासी जनजाति र दलित समुदाय खुल्ने परिचय पत्रको प्रतिलिपि र सिफारिस सहित केन्द्रमा पेस गर्नुपर्नेछ । आवेदन आगामी असार ९ गतेसम्म दिन सकिनेछ ।

केन्द्रले यसअघि पनि २०७८ फागुन ९ गते सूचना निकालेर अति दुर्गम र दुर्गम ठाउँबाट काठमाडौंमा आएर अध्ययनरत विद्यार्थीकाे आवेदन माग गरेको थियो । यसअघि आवेदन दिने विद्यार्थीले पुन निवेदन दिन नपाउने केन्द्रले जनाएको छ ।