माइतीघरबाट हटाउन थालियाे विद्युतीय पोलका अव्यवस्थित तार

काठमाडौं । इन्टरनेट सेवा प्रदायक, काठमाडौं महानगरपालिकाको नगर प्रहरी बल, नेपाल विद्युत प्राधिकरण, दूरसञ्चार प्राधिकरण, नेपाल टेलिकम लगायतका सरोकारवालाहरूको टोलीले अव्यवस्थित र अनावश्यक तार हटाउन थालेका छन् । सोमबार (बैंशाख २५ गते) देखि विद्युतीय पोलमा रहेको अनावश्यक तार हटाउन सुरु गरिएको हो ।

आइतबार काठमाडौं महानगरपालिका, नेपाल दूरसंचार प्राधिकरण, इन्टरनेट सेवा प्रदायकसहित सरोकारवालाहरूबीच भएको छलफलले सोमबारबाटै अव्यवस्थित तार हटाउने समझदारी कायम गरेको थियो  । समझदारी अनुसार सोमबार बिहानदेखि माइतीघर र न्यूरोड गेटबाट तारमा चिह्न लगाउने र अनावश्यक तार हटाउन थालिएको महानगरका महानगर प्रहरी इश्वर वाक्लेले बताए ।

पहिलो चरणमा माइतीघर–नयाँ बानेश्वर हुँदै त्रिभुवन अन्तर्राष्ट्रिय विमानस्थल र न्यूरोड गेट–हनुमानढोका हुँदै असनसम्मका अव्यवस्थित तार हटाउन सुरु गरेको जनाइएको छ । अव्यवस्थित तार हटाउन विभिन्न १० वटा रुट तयार गरिएको छ । 

प्राधिकरण, महानगरपालिकाले सहरभर टाँगिएका अनावश्यक तार हटाउने बारम्बार सूचना निकाल्दै आएका थिए । गत बैशाख १२ गते महानगरले १५ दिने सूचना जारी गरी पोलमा टाँगिएका, सडक किनारामा छाडिएका अनावश्यक तार हटाउन र आवश्यक पर्ने तारमा संकेत चिह्न लगाउन भनेको थियो । साेही अनुरुप काम सुरु गरिएकाे हाे ।