ऊर्जा खबर
काठमाडौं । नुवाकोटमा निर्माणाधीन ३७ मेगावाटको माथिल्लो त्रिशुली-३ 'बी' जलविद्युत आयोजनाको लागि कर्मचारी माग गरिएको छ । आयोजनाको ठेकेदार कम्पनी शुइफा एएनएचई ग्रुप कम्पनीले ९७ कर्मचारी माग गरेको हो ।
निर्माणाधीन आयोजनास्थलमा खटाउने गरी कर्मचारी माग गरिएको कम्पनीले जनाएको छ । कम्पनीले एक जना आयोजना प्रबन्धक, एक जना उप–प्रबन्धक र एक जना प्रबन्ध निर्देशक माग गरेको छ ।
यस्तै, २० जना प्रबन्धक र ३५ जना प्राविधिकका लागि आवेदन खुलाएको छ । इन्जिनियरीङ विभागका लागि २० जना, वित्तीय विभागका लागि ३ जना, प्रशासन विभागका लागि ५ जना र खरिद विभागका लागि ५ जना कर्मचारी माग गरेको कम्पनीले जनाएको छ ।
गुणस्तर व्यवस्थापन विभागका लागि ३ जना र अनुवादक, निरीक्षण र संयोजकका लागि ३ जना कर्मचारी माग गरेको छ । योग्य इच्छुक व्यक्तिले आगामी बुधबार (बैशाख १ गते) सम्म आवेदन दिन सक्नेछन् ।
आवेदकले बायोेडाटा, नेपाली नागरीकताको प्रमाणपत्रको प्रतिलिपि, शैक्षिक योग्यताको प्रमाणपत्र प्रतिलिपि, पासपोर्ट साइजको फोटोसहित आवेदन बुझाउनुपर्नेछ । आवेदक चिनियाँ तथा अग्रेजी भाषामा सक्षम हुनुपर्ने पनि कम्पनीले जनाएको छ ।
सम्बन्धित विषयको शैक्षिक योग्यता पुगेको तथा लामो कार्यानुभव भएको व्यक्तिले प्राथमिकता पाउने कम्पनीले जनाएको छ । रोजगारीको अवसर पाउने व्यक्तिले कम्पनीले निर्माण गरिरहेको आयोजना स्थलमा गई काम गर्नुपर्नेछ ।
