ऊर्जा खबर
काठमाडौं । नदी तथा खोलामा पानीको सतह विस्तारै कम हुन थालेपछि भारतबाट विद्युत आयात फेरि सुरु भएको छ । नेपाल विद्युत प्राधिकरणले माग र आपूर्ति व्यवस्थापन मिलाउन आइतबारबाट विद्युत आयात गर्न सुरु गरेको हो ।
विद्युत प्राधिकरण, सहायक कम्पनी र निजी क्षेत्रका जलविद्युतगृहले उत्पादन घटाउँदै लगेकाले पनि विद्युत आयात सुरु गर्नुपर्ने अवस्थाको आएको हो । आन्तरिक उत्पादन बढेसँगै विद्युत माग समेत वर्षेनी बढिरहेकाले पनि हिउँदको माग व्यवस्थापन गर्न भारतको विद्युतमा अझै केही वर्ष निर्भर हुनुपर्ने बाध्यता प्राधिकरणलाई छ ।
प्राधिकरणकाे आइतबारकाे तथ्यांकअनुसार आपूर्ति व्यवस्थापन मिलाउन २०२ मेगावाट घन्टा विद्युत भारततर्फबाट आयात गरेको छ । आयात गरिएको विद्युतको परिमाण निर्यातको तुलनामा भने कम हो । प्राधिकरणले सोही दिन बिहारतर्फ १ हजार ६० मेगावाट घन्टा विद्युत पठाएको छ ।
आइतबारको उच्च विद्युत माग १४४५ मेगावाट हुँदा कूल माग २६ हजार ७ सय ९६ गिगावाट घन्टा रहेको प्राधिकरणले जनाएको छ । प्राधिकरणका विद्युत आयोजनाले ९ हजार ८ सय ७२ गिगावाट घन्टा विद्युत उत्पादन गरेका छन् ।
प्राधिकरणका सहायक कम्पनीमार्फत सञ्चालित जलविद्युत आयोजनाले ६ हजार २ सय २९ मेगावाट घन्टा र निजी क्षेत्रका विद्युत आयोजनाले १० हजार ४ सय ९३ गिगावाट घन्टा विद्युत आइतबार राष्ट्रिय प्रसारण प्रणालीमा योगदान गरेका छन् ।
प्राधिकरणका अनुसार भारतको बिहार राज्यसँगको बर्खा याम विद्युत दिने र सुख्खा याममा लिने सहमति अनुसार अहिले आयात सुरु गरिएको हो । आउने बैशाखसम्म नै भारतीय विद्युतमा निर्भर हुनुपर्ने बाध्यता रहेकाले अहिलेको आयात परिमाण क्रमशः बढ्दै जाने निश्चित छ ।
यो वर्ष माथिल्लो तामाकोसीको विद्युत प्रणालीमा थपिए पनि सुख्ख याममा गत वर्षकै हाराहारीमा विद्युत आयात गर्नुपर्ने अवस्था आउन सक्ने अनुमान छ । गत वर्ष सुख्खा याममा निजी क्षेत्रको उत्पादन २४० मेगावाटसम्म झरेको थियो । प्राधिकरणका जलविद्युतगृहको कूल उत्पादन पनि ४ सय मेगावाट हाराहारीमा झरेको थियो ।
बर्खामा सबै जलविद्युतगृह पूर्ण क्षमतामा चल्ने हुँदा उत्पादन बढ्न गई दैनिक करिब ८ सय मेगावाटसम्म विद्युत खेर जाने अवस्था आउँदा प्राधिकरणले खपत बढाउन ग्राहकलाई प्रोत्साहन गर्दै आएको थियो । सुख्खा याममा भने कुलेखानी जलाशय चलाउँदा समेत विद्युत आयात गर्नुपर्ने बाध्यता छ ।
