ऊर्जा खबर
काठमाडौं । स्वतन्त्र ऊर्जा उत्पादकहरूको संस्था, नेपाल (इपान) ले लुम्बिनी प्रदेश कमिटि गठन गरेको छ । ऊर्जा उत्पादक कुबेरमणि नेपालको संयोजकत्वमा साेमबार ७ सदस्यीय कमिटि गठन गरिएको हो ।
नेपाल संयोजक रहेको कमिटिमा जयराम अर्याल सह–संयोगक नियुक्त भएका छन् । सचिवमा सन्तोष अधिकारी र कोषाध्यक्षमा आशिष सुवेदीलाई चयन गरिएको छ ।
यस्तै, सदस्यहरूपमा ध्रुव मिश्र, प्रवीण अर्याल र बलराम उप्रेतीलाई नियुक्त गरिएको छ । नवनियुक्त कमिटिका सबै पधाधिकारीलाई इपान अध्यक्ष कृष्ण आचार्यले सपथ दिलाए ।
कमिटिले लुम्बिनी प्रदेश स्तरमा देखिएका समस्या समाधानका लागि नीतिगत पहल गर्ने आचार्यले बताए । ‘मुलुक संघियतामा गइसकेकाले धेरै ऊर्जा क्षेत्रका धेरै काम प्रदेश स्तरबाट नै गराउनु पर्ने भएको छ,’ उनले भने, ‘यही कारण पनि प्रदेश स्तरका समस्याको नीतिगत समाधानको पहलका लागि यो कमिटि गठन गरेका हौं ।’
उनले इपानको सबै प्रदेश कमिटि बनिसकेपछि प्रदेश स्तरका स्थानीय अवरोध, प्रसारण लाइन निर्माणमा भइरहेको ढिलाईलगायत समस्या समाधानका लागि सम्बन्धित निकायसम्म पहल तथा समन्वय गरेर जाने बताए ।
संघीय संरचना अनुसार इपानको विधानअनुसार प्रदेश कमिटि गठन गरिएको हो । यसअघि डेडराज खड्काको संयोजकत्वमा प्रदेश–१ कमिटि गठन भइसकेको छ । क्रमशः ७ वटै प्रदेशका लागि कमिटि गठन गर्ने इपानले जनाएको छ ।
२०७६ माघ १० गते बसेको इपान सञ्चालक समितिको बैठकले ११ सदस्यीय कार्यसमिति विस्तार गरी २३ पुर्याउने उद्देश्यले विधान संशोधन गरेको थियो । जसअनुसार प्रदेश स्तरमा एक–एक जना संयोजक तोकेर कार्यसमिति गठन गर्ने प्रावधान छ ।
