यशाेदा सुनुवार
काठमाडाैं । नेपाल विद्युत् प्राधिकरणले उपभोक्ताका घरमा स्मार्ट जडान गर्दा कुनै पनि शुल्क नलाग्ने बताएको छ । प्राधिकरणबाट खटिने कर्मचारीले निशुल्क मिटर जडान गर्नुपर्ने हुँदा कसैले रकम मागे नदिन आग्रह गरिएको छ ।
प्राधिकरणले आज (शुक्रबार, मंसिर १२ गते) सूचना प्रकाशित गरी स्मार्ट मिटर निशुल्क जडान गरिने सूचित गरेको छ । अहिले पहिलो चरणमा रत्नपार्क र महाराजगन्ज वितरण केन्द्रअन्तर्गतका ९० हजार ग्राहकमा स्मार्ट मिटर जडान सुरु गरेको छ । अहिलेसम्म करिब १५ हजार जडान भइसकेको जनाइएको छ ।
चीनको पिंगाओ विज्डम जोइन्ट भेन्चर कम्पनीसँग ठेक्का सम्झौता गरी आयात भएका मिटरहरू जडान भइरहेको प्राधिकरणले जानकारी दिएको छ । प्राधिकरणका अनुसार ३२ हजार मिटर आइसकेको र बाँकी आउने क्रममा रहेका छन् ।
दोस्रो चरणमा उपत्यकाका ११ वितरण केन्द्र मध्ये ९ वटामा स्मार्ट जडान प्रक्रिया सुरु हुने जनाइएको छ । दोस्रो चरणमा उपत्यकाका ३ लाख १५ हजार ग्राहकमा मिटर जडान गर्ने कार्यक्रम छ । यसका लागि ठेक्का प्रक्रिया सुरु भइसकेको पनि जनाइएको छ ।
यशाेदा सुनुवार आधा दशकदेखि ऊर्जा तथा जलविद्युत पत्रकारितामा क्रियाशील छन् ।
