अरुण भ्यालीले ३० मेगावाटको लिखु खोलामा साढे ९३ करोड लगानी गर्दै

काठमाडौं । ३ मेगावाटको पिलुवा खोला र ९.८४ मेगावाटको काबेली बी–क्यासकेड जलविद्युत आयोजना निर्माण गरी सञ्चालन गरिरहेको अरुण भ्याली हाइड्रो पावर डेभलपमेन्ट कम्पनी लिमिटेडले लिखु खोला जलविद्युत आयोजनामा लगानी गर्ने भएको छ ।

पिके हाइड्रो पावर प्रालिले निर्माण गरिरहेको ३० मेगावाटको आयोजनामा अरुण भ्यालीले साढे ९३ करोड रुपैयाँ लगानी गर्ने भएको हो । आयोजनामा स्वपूँजीका लागि ९३ करोड ३९ लाख ८१ हजार ३ सय रुपैयाँ लगानी गर्न लागेको अरुण भ्यालीले जनाएको छ ।

कम्पनीले आयोजनामा लगानी जुटाउनका लागि हकप्रद सेयर निष्कासन गर्ने तयारी गरेको छ । हकप्रद सेयर निष्कासन गर्न विद्युत नियमन आयोगबाट अनूमति प्राप्त भई सकेको छ । अब, असार ७ गते हुने साधारणसभाले पारित गरेपछि सेयर निष्कासन गरी बाँडफाँड गरिनेछ ।

कम्पनीले चुक्ता पूँजीको १ अर्ब ८३ करोड ७९ लाख ६२ हजार ६ सय रुपैयाँ बराबरको १ः१ को अनुपातमा हकप्रद सेयर निष्कासन गर्ने निर्णय गरेको छ । हकप्रद सेयर निष्कासनबाट प्राप्त रकम आयोजना लगानी गर्ने र बाँकी ९३ करोड ३९ लाख ८१ हजार ३ सय रुपैयाँ कम्पनीले सञ्चालनमा गरीरहेको काबेली बी–१ क्यासकेड जलविद्युत आयोजना निर्माण गर्दा बैंकहरूबाट लिएको ऋण भुक्तानी गर्ने निर्णय भएको कम्पनीले जनाएको छ ।

यो कम्पनीको ३ मेगावाटको पिलुवा खोला र ९.८४ मेगावाटको काबेली बी–क्यासकेड सञ्चालनमा छन् ।