ऊर्जा खबर
काठमाडौं । चिलिमे जलविद्युत कम्पनी लिमिटेडले उत्पादन गरेको २२ मेगावाट विद्युत भारत निर्यात हुने भएको छ । नेपाल विद्युत प्राधिकरणले रसुवामा उत्पादित उक्त आयोजनाको विद्युत निर्यात अनुमति पाएको हो ।
थप २२ मेगावाट बिजुली भारत निर्यातका लागि अनुमति पाएको प्राधिकरणका प्रवक्ता सुरेश बहादुर भट्टराईले बताए । उनका अनुसार थप चिलिमेको २२ सँगै अब दैनिक ३८६ मेगावाट विद्युत भारत निर्यात हुनेछ ।
प्राधिकरणले देशभित्र खपत गरी अतिरिक्त भएको वर्षायामको थप १००.९ मेगावाट विद्युत इन्डियन इनर्जी एक्सचेन्ज लिमिटेड (आइएक्स) को डे–अहेड बजारमा प्रतिस्पर्धामार्फत बिक्री प्रस्ताव पनि अघि बढाएको छ ।
निजी क्षेत्रले निर्माण गरेका २९ मेगावाट क्षमताको लिखूखोला ए, २५ मेगावाट क्षमताको काबेली बी–१, २२ मेगावाटको माईखोला, १५ मेगावाट क्षमताको हेवाखोला ‘ए’ र १० मेगावाटको तल्लो मोदी–१ जलविद्युतगृहबाट उत्पादिते विद्युत निर्यातको प्रस्ताव गरिएको छ ।
प्राधिकरणले देशभित्र खपत गरी अतिरिक्त भएको वर्षायामको विद्युत २०७९ जेठदेखि इन्डियन इनर्जी एक्सचेन्ज लिमिटेड (आइएक्स) को डे–अहेड बजारमा प्रतिस्पर्धामार्फत बिक्री सुरु गरेको थियो । देशभित्र खपत गरी अतिरिक्त भएको विद्युत भारततर्फ निर्यात गरी त्यस अवधिमा करिब ८ अर्ब रुपैयाँ आम्दानी भएको छ ।
