ऊर्जा खबर
काठमाडौँ । दार्चुला जिल्लाको अपिहिमाल गाउँपालिका–१, भट्टारस्थित चमेलिया अर्थात् चौलानी नदीमा डाँडै खस्ने गरी गएको पहिरोले केही समय नदी थुनिए पनि त्यस क्षेत्रका जलविद्युत् आयोजनाहरू पूर्णरूपमा सुरक्षित रहेका छन् । नदीले आफ्नो धार अर्थात् गति समातिसकेको हुँदा आपतकालीन अवस्था नदेखिएको हो ।
पहिरो ४० मेगावाटको माथिल्लो चमेलिया जलविद्युत् आयोजनाभन्दा करिब १५ किलोमिटर माथि खसेको र केही समय पानी सञ्चित भएको अपि पावर कम्पनी लिमिटेडका प्रबन्ध सञ्चालक सञ्जिव न्यौपानेले बताए । 'उक्त पहिरोले नदीको बहाव केही समय रोकिएको हो, अहिले पुनः आफ्नो साविककै लय समातिसकेको छ,' उनले भने ।
नदी थुनिएपछि उत्पन्न जोखिमका बाबजुद जलविद्युत् आयोजनाको भौतिक संरचना तथा उत्पादनमा कुनै असर नपरेको पनि न्यौपानेले जानकारी दिए । माथिल्लो चमेलियाभन्दा माथिल्लो तटीय क्षेत्रमा सञ्चालनरत १० मेगावाटको मकरीगाढ पनि पूर्ण सुरक्षित रहेको उनको भनाइ छ ।
यसअघि, जिल्ला प्रशासन कार्यालय दार्चुलाले एक सार्वजनिक सूचना जारी गर्दै चौलानी नदीमा पहिरो खस्ने क्रम जारी रहेको र नदी आधा थुनिएकाले पूरै थुनिन सक्ने जोखिम औंल्याएको थियो । जिल्ला प्रशासनले सम्भावित जोखिमबाट बच्न र धनजनको क्षति न्यूनीकरण गर्न तटीय क्षेत्रमा बसोबास गर्ने नागरिक तथा सम्बद्ध निकायलाई उच्च सतर्कता अपनाउन अपिल गरेको थियो । प्रशासनले बाढी र पहिरो सम्बन्धी आपत्कालीन जानकारी तथा उद्धारका लागि जिल्ला आपत्कालीन कार्यसञ्चालन केन्द्र र सुरक्षा निकायका सम्पर्क नम्बरहरू समेत सार्वजनिक गरेको छ ।
