निषेधाज्ञाका कारण सामलिङ्ग पावरको सेयर निष्कासन स्थगित

काठमाडौं । सामलिङ्ग पावर कम्पनीले आयोजना प्रभावित जिल्लाका स्थानीयबासीका लागि निष्कासन गर्न लागेको सेयर बिक्री स्थगित भएको छ । इलाममा कोरोना महामारीकाे संक्रमण बढेपछि साउन १८ गतेदेखि गरिएको निषेधाज्ञाका कारण सेयर निष्कासन स्थगित गरिएको हो ।

इलामस्थित निर्माणाधीन ९.५१ मेगावाटको माइबेनी खोला जलविद्युत आयोजना प्रभावित क्षेत्रका बासिन्दाहरूका आगामी २२ गते (शुक्रबार) देखि सेयर निष्कासन गर्ने तालिका थियो । तर, इलाममा २५ गते (सोमबार) सम्मका लागि निषेधाज्ञा जारी भएकोले  सेयर बिक्री स्थगित गरिएको कम्पनीले जनाएको छ । कम्पनीका अनुसार परिस्थिती सहज भएपछि पुनःअर्को सुचना प्रकाशित गरी सेयर निष्कासन तथा बिक्री खुल्ला गरिनेछ ।

कम्पनीले प्रतिकित्ता सय रुपैयाँमा अंकित ५ करोड रुपैयाँ बराबरको ५ लाख कित्ता सेयर निष्कासन गर्नेछ । निष्कासन हुने सेयरमध्ये ६० प्रतिशत अर्थात ३ लाख कित्ता आयोजना प्रभावित क्षेत्र ईलाम जिल्लाभरीका बासिन्दाहरुका लागि र बाँकी ४० प्रतिशत अर्थात २ लाख कित्ता आयोजना अति प्रभावित क्षेत्र ईलाम नगरपालिका वडा नम्बर ८ र १० तथा माईजोगमाई गाँउपालिका वडा नम्बर ४ र ५ का बासिन्दाहरुका लागि छुट्याइएको छ ।

लगानीकर्ताले न्यूनतम १० कित्तादेखि अधिकतममा २० हजार कित्ताका लागि आवेदन दिन सक्नेछन् । आवेदकले नेपाल एसबिआई, एनएमबि, सिद्धार्थ, सिभिल र लक्ष्मी बैंकका ईलाम शाखा कार्यालयबाट आवेदन दिन सक्नेछन् । कम्पनीको सेयर निष्कासन तथा बाँडफाँड गर्न नेपाल एसबिआई मर्चेण्ट बैंकिङ्ग लिमिटेडलाई बिक्री प्रबन्धक तोकिएको छ । कम्पनीले निर्माण गरिरहेको आयोजनाको काम अन्तिम चरणमा पुगेको छ ।