ऊर्जा खबर
काठमाडौं । दोलखास्थित २५ मेगावाटको सिंगटी खोला जलविद्युत आयोजनाले व्यापारिक विद्युत उत्पादन सुरु गरेको छ । २ साताको परीक्षणको चरण पूरा भएपछि आयोजनाबाट व्यापारिक उत्पादन सुरु गरिएको हो ।
आयोजनाले नेपाल विद्युत प्राधिकरणलाई औपचारिकरूपमा विद्युत बिक्री गर्न सुरु गरेको प्रवर्द्धक सिंगटी हाइड्रो इनर्जी कम्पनीका कार्यकारी निर्देशक गणेश कार्कीले बताए । उनका अनुसार प्राधिकरणले साउन १७ गतेदेखिको उत्पादन व्यापारिक मानिएकाे चिठ्ठी कम्पनीलाई दिएको छ ।
अहिल आयोजनाले अहिले पूर्ण क्षमतामा विद्युत उत्पादन गरिरहेको छ । ‘परीक्षण उत्पादन गरेर प्राधिकरणलाई निशुल्क विद्युत दिने चरण पूरा भएपछि व्यापारिक उत्पादन सुरु गरेका छौं,’ उनले ऊर्जा खबरसँग भने, ‘अब आयोजनाले विद्युत बिक्रीबाट आम्दानी गर्न सुरु गरेको छ ।’
परीक्षणको उत्पादनको चरणमा आयोजनाले प्राधिकरणलाई ४ करोड रुपैयाँको विद्युत निशुल्क दिएको पनि उनले बताए । व्यापारिक उत्पादन सुरु भएपछि भने कम्पनीले आयोजनाबाट उत्पादन हुने विद्युत बिक्री गरी वार्षिक ७२ करोड रुपैयाँ आम्दानी गर्ने पनि उनले बताए ।
आयोजनाले गत साउन १ गतेदेखि परीक्षण उत्पादन सुरु गरेको थियो । आयोजनाको विद्युत १३२ केभी सिंगटी सबस्टेसनमा जोडिएको छ । विद्युत प्राधिकरणले १३२ केभी सिंगटी–लामोसाँघु प्रसारण लाइन निर्माण सम्पन्न गरी सञ्चालन गरेको भोलिपल्ट नै आयोजनाबाट परीक्षण उत्पादन सुरु गरिएको थियो ।
आयोजनाको निर्माण करिब डेढ वर्षअघि नै सम्पन्न भएको भए पनि प्रसारण लाइन समस्याले लामो समय विद्युत खेर फाल्नु परेको थियो । डेढ वर्षसम्म उत्पादन सुरु हुन नसक्दा आयोजनाले विद्युत बिक्रीबाट गर्ने १ अर्ब रुपैयाँ आम्दानी गुमेको थियो ।
सिंगटी सरकारले प्रतिस्पर्धा गराएर निजी क्षेत्रलाई निर्माण गर्न दिएका ‘सुपर सिक्स’ अन्तर्गतका ६ मध्ये एउटा जलविद्युत आयोजना हो । ६ मध्ये सिंगटी र २३.५ मेगावाटको सोलु खोला जलविद्युत आयोजना निर्माण सम्पन्न भई सञ्चालनमा आइसकेका छन् । ८२ मेगावाटको तल्लो सोलु निर्माणको अन्तिम चरणमा पुगेको छ । बाँकी आयोजना पनि निर्माणको विभिन्न चरणमा छन् ।
