ऊर्जा खबर
काठमाडौं । मध्यभोटेकोसी जलविद्युत कम्पनीको सेयर बिक्री खुल्ला भएको छ । कम्पनीले मंगलबार (आज) बाट सिन्धुपाल्चोकमा निर्माणाधीन १ सय २ मेगावाटको मध्यभोटेकोसी जलविद्युत आयोजना प्रभावित क्षेत्रका स्थानीयका लागि छुट्याएको सेयर बिक्री खुल्ला गरेको हो ।
प्रतिकित्ता १ सय रुपैयाँ अंकित ६० करोड रुपैयाँ बराबरको ६० लाख कित्ता सेयर निष्कासन गरिएको कम्पनीले जनाएको छ । कम्पनीका अनुसार निष्कासित सेयरमध्ये ३० प्रतिशत अर्थात १८ लाख कित्ता सेयर आयोजना प्रभावित क्षेत्र सिन्धुपाल्चोक जिल्लाको भोटेकोसी गाउँपालिका वडा नंबर १ र ५, बाह्रबिसे नगरपालिका वडा नंबर ५, ६, ७ र ८ मा स्थायी बसोबास गर्ने बासिन्दालाई छुट्याइएको छ ।
बाँकी ७० प्रतिशत अर्थात ४२ लाख कित्ता सिन्धुपाल्चोक जिल्लाको अन्य क्षेत्रमा बसोबास गर्ने बासिन्दाका लागि छुट्याइएको छ । स्थानीयले न्युनतम १० कित्तादेखि अधिकतम ४ सय कित्ता सम्मका लागि आवेदन दिन पाउनेछन् । स्थानीयले छिटोमा जेठ ४ गते र ढिलोमा जेठ २० गतेसम्म आवेदन दिन सक्नेछन् ।
इच्छुक स्थानीयबासीले ग्लोबल आइएमई, लक्ष्मी, मेगा, नेपाल क्रेडिट एण्ड कमर्श, सिन्धु विकास, नेपाल इन्भेष्टमेन्ट, सिभिल, प्रभु, नेपाल बंगलादेश, कुमारी, बैंक अफ काठमाडौं र एनआईसी एसीया बैंकका सिन्धुपाल्चोक शाखा कार्यालयबाट आवेदन दिन सक्नेछन् ।
स्थानीयलाई छुट्याएको सेयर निष्कासन गरी बाँडफाँड गरिसकेपछि सर्वसाधारणका लागि छुट्याएको ९० करोड रुपैयाँ बराबरको ९० लाख कित्ता सेयर निष्कासन गरिने कम्पनीले जनाएको छ ।
कम्पनीले यसअघि पहिलो चरणमा कर्मचारी संचयकोषमा रकम संचित गर्ने संचयकर्ताका लागि १९.५ प्रतिशत अर्थात १ करोड १७ लाख कित्ता, संस्थापक कम्पनीका कर्मचारीका लागि ३.५ प्रतिशत अर्थात २१ लाख कित्ता र ऋणदाता संस्थाका कर्मचारीका लागि १ प्रतिशत अर्थात ६ लाख कित्ता गरी कुल १ करोड ४४ लाख कित्ता सेयर निष्कासन गरी बाँडफाँड गरिसकेको छ ।
कम्पनीको सेयर निष्कासन गरी बाँडफाँड गर्न ग्लोबल आइएमई क्यापिटलाई बिक्री प्रबन्धक तोकिएको छ । चिलिमेको सहायक मध्यभोटेकोसीले सिन्धुपाल्चोकमा १ सय २ मेगावाटको मध्यभोटेकोसी जलविद्युत आयोजना निर्माण गरिरहेको छ ।
