ऊर्जा खबर
काठमाडौं । डेढ दर्जन जलविद्युत कम्पनीले आयोजना प्रभावित क्षेत्रका स्थानीयबासी तथा सर्वसाधारणका लागि साधारण सेयर निष्कासन गर्ने प्रक्रिया अघि बढाएका छन् । निजी लगानीमा निर्माणाधीन तथा निर्माण सम्पन्न भई सञ्चालनमा आएका जलविद्युत आयोजनाका प्रवर्द्धक कम्पनीले करिब ५ करोड कित्ता साधारण सेयर निष्कासनको तयारी गरेका हुन् ।
कम्पनीले सय रुपैयाँमा अंकित ४ करोड ९३ लाख ८२ हजार १ सय ३९ कित्ता साधारण सेयर निष्कासन अनुमतिका लागि नेपाल धितोपत्र बोर्डमा आवेदन दिएका छन् । सेयर निष्कासन अनुमतिका लागि आवेदन दिएका मध्ये केही जलविद्युत कम्पनीले वर्षौसम्म पनि स्विकृत पाउन सकेका छैनन् । सबै प्रक्रिया पूरा भइनसकेकाले कम्पनीले अझै अनुमति पाएका छैनन् ।
आवेदन दिने मध्ये सबैभन्दा बढी साधारण सेयर ग्रीन भेन्चर कम्पनीको रहेको छ । कम्पनीले ६२ लाख ५० हजार कित्ता साधारण सेयर निष्कासन गर्ने भएको छ । कम्पनीले रामेछापमा निर्माण सम्पन्न ५२.४ मेगावाटकको लिुख–४ जलविद्युत आयोजना प्रभावित स्थानीय र सर्वसाधारणका लागि छुट्याएको सेयर निष्कासन गर्न लागेको हो ।
प्रतिकित्ता सय रुपैयाँमा अंकित ६२ करोड ५० लाख रुपैंया बराबरको साधारण सेयर निष्कासन अनुमतिका लागि बोर्डमा गत फागुन २७ गते आवेदन पेश गरेको कम्पनीले जनाएको छ । कम्पनीको सेयर निष्कासन गरी बाँडफाँड गर्न लक्ष्मी क्यापिटललाई बिक्री प्रबन्धक तोकिएको छ ।
यस्तै, सयपत्री हाइड्रो पावर कम्पनीले ९ करोड रुपैयाँ मूल्यको ९ लाख कित्ता साधारण सेयर निष्कासन अनुमतिका लागि बोर्डमा आवेदन दिएको छ । कम्पनीले बागलुङमा सञ्चालित २.५ मेगावाटको दरमखोला जलविद्युत आयोजनाको साधारण सेयर निष्कासन गर्न अनुमतिका लागि गत फागुन २० गते आवेदन दिएको हो ।
कम्पनीले स्थानीयका लागि ३ लाख कित्ता र ६ लाख कित्ता सेयर सर्वसाधारणका लागि छुट्याइएको छ । कम्पनीले सेयर निष्कासन गरी बाँडफाँड गर्न एनआइबीएल एसीइ क्यापिटलाई बिक्री प्रबन्धक तोकेको छ । कम्पनीले बागलुङमा निर्माण सम्पन्न गरी सञ्चालनमा ल्याएको आयोजनाले २०७३ असार १२ गतेदेखि नियमीत विद्युत उत्पादन गरिरहेको छ ।
मोलुङ हाइड्रोपावर कम्पनीले ३५ लाख ३१ हजार कित्ता साधारण सेयर निष्कासन अनुमतिका लागि गत साउन १ गते आवेदन दिएको छ । कम्पनीले ओखलढुङगामा सञ्चालित ७ मेगावाटको मोलुङ खोला जलविद्युत आयोजनाको सर्वसाधारण र आयोजना प्रभावित स्थानीयका लागि छुट्याएको साधारण सेयर निष्कासन गर्न लागेको हो ।
कम्पनीको सेयर निष्कासन गरी बाँडफाँड गर्न सनराइज क्यापिटल लिमिटेडलाई बिक्री प्रबन्धक चयन गरिएको छ । कम्पनीले निर्माण सम्पन्न गरी सञ्चालनमा ल्याएको आयोजनाले २०७४ चैत्र २३ गतेदेखि नियमीत विद्युत उत्पादन गरिरहेको छ ।
थ्रिस्टार हाइड्रोपावर कम्पनीले पनि १२ लाख ३१ हजार २ सय ५० कित्ता साधारण सेयर निष्कासन गर्ने भएको छ । कम्पनीले सेयर निष्कासन अनुमतिका लागि बोर्डमा गत साउन १७ गते आवेदन दिएको छ । कम्पनीले सेयर निष्कासन गरी बाँडफाँड गर्न हिमालयन क्यापिटल लिमिटेडलाई बिक्री प्रबन्धक तोकेको छ ।
राप्ति हाइड्रो एण्ड जनरल कन्स्ट्रक्सनले पनि सर्वसाधारण र स्थानीयका लागि २९ लाख ४१ हजार ४ सय १० कित्ता साधारण सेयर निष्कासन गर्ने भएको छ । कम्पनीले सेयर निष्कासन अनुमतिका लागि बोर्डमा गत भदौ ८ गते आवेदन दिएको थियो । कम्पनीको सेयर निष्कासन गरी बाँडफाँड गर्न सिद्धार्थ क्यापिटलाई बिक्री प्रबन्धक तोकिएको छ ।
स्वेतगंगा हाइड्रो पावर एण्ड कन्स्ट्रक्सनले पनि आयोजना प्रभावित स्थानीय र सर्वसाधारणका लागि ४७ लाख ७९ हजार कित्ता सेयर निष्कासन गर्ने तयारी गरेको छ । बोर्डबाट अनुमति पाउने लगतै सेयर निष्कासन गरी बाँडफाँड गरिने बिक्री प्रबन्धक सानिमा क्यापिटल लिमिटेडले जनाएको छ ।
मन्दाकिनी हाइड्रो पावरले पनि १७ लाख ६४ हजार १ सय १० कित्ता साधारण सेयर निष्कासन गर्ने भएको छ । कम्पनीले आयोजना प्रभावित स्थानीय र सर्वसाधारणका लागि छुट्याएको सेयर निष्कासन गर्न लागेको हो । कम्पनीको सेयर बिओके क्यापिटल मार्केटले निष्कासन गरी बाँडफाँड गर्नेछ ।
सिक्लेस हाइड्रो पावरले कास्कीमा सञ्चालति १३ मेगावाटको मद्क्यु जलविद्युत केन्द्रको स्थानीय र सर्वसाधारणका लागि छुट्याएको २० लाख कित्ता सेयर निष्कासन गर्ने भएको छ । कम्पनीले सेयर निष्कासन गरी बाँडफाँड गर्न बिओके क्यापिटललाई बिक्री प्रबन्धक तोकेको छ ।
सुपर माई हाइड्रो पावरले १० लाख कित्ता सेयर निष्कासन गर्ने तयारी गरेको छ । कम्पनीले इलाममा सञ्चालित ७.८ मेगावाटको सुपर माई जलविद्युत केन्द्रको सेयर निष्कासन गरी बाँडफाँड गर्न सानिमा क्यापिटललाई बिक्री प्रबन्धक चयन गरेको छ ।
सान्जेन जलविद्युत कम्पनीले पनि रसुवामा निर्माणाधीन १४.८ मेगावाटको माथिल्लो सान्जेन र ४२.५ मेगावाटको सान्जेन जलविद्युत आयोजनाको साधारण सेयर निष्कासन अनुमतिका लागि बोर्डमा आवेदन दिएको छ । ३६ लाख ५० हजार कित्ता सेयर निष्कासन गर्न सिटिजन्स इन्भेसमेन्ट ट्रस्टलाई बिक्री प्रबन्धक तोकेको छ ।
इष्टर्न हाइड्रो पावरले १२ लाख ४० हजार कित्ता साधारण सेयर निष्कासन अनुमतिका लागि बोर्डमा आवेदन दिएको छ । कम्पनीले भोजपुरमा सञ्चालित ५ मेगावाटको पिखुवा खोला जलविद्युत केन्द्र प्रभावित स्थानीय र सर्वसाधारणका लागि छुट्याएको साधारण सेयर निष्कासन गर्न लागेको हो ।
रिभर फल्स पावर कम्पनीले ३४ लाख ३० हजार कित्ता साधारण सेयर निष्कासन गर्ने भएको छ । कम्पनीले संखुवासभामा निर्माणाधीन १०.३ मेगावाटको डाउन पिलुवा खोला जलविद्युत आयोजनाको स्थानीय र सर्वसाधारणका लागि छुट्याएको साधारण सेयर निष्कासन गर्न लागेको हो । सेयर निष्कासन गरी बाँडफाँड गर्न प्रभु क्यापिटल लिमिटेडलाई बिक्री प्रबन्धक तोकिएको छ ।
कम्पनीले निर्माण गरीरहेको आयोजनाको काम आधाभन्दा बढी पूरा भएको छ । २०७० फागुनमा नै उत्पादन अनुमति लिई अघि बढेको आयोजनाबाट २०७९ साउनदेखि विद्युत उत्पादन गर्ने लक्ष्य छ ।
बिन्ध्यबासिनी हाइड्रोपावर डेभलपमेन्ट कम्पनीले २५ लाख कित्ता सेयर निष्कासन गर्न सानिमा क्यापिटललाई बिक्री प्रबन्धक तोकेको छ । हिमालयन हाइड्रोपावर कम्पनीले पनि स्थानीय र सर्वसाधारणका लागि छुट्याएको २२ लाख ५० हजार कित्ता सेयर निष्कासन गर्ने भएको छ ।
कम्पनीले २२ करोड ५० लाख रुपैयाँ बराबरको सेयर निष्कासन गर्न ग्लोबल आइएमई क्यापिटललाई बिक्री प्रबन्धक चयन गरेको छ । यो कम्पनीले बोर्डमा आवेदन दिएको १ वर्ष नाघिसकेको छ । कम्पनीले २०७६ असोज २७ गते आवेदन दिएको थियो ।
बलेफी हाइड्रोपावर कम्पनीले ३६ करोड ५५ लाख ९४ हजार रुपैयाँ बराबरको ३६ लाख ५५ हजार ९ सय ४४० कित्ता साधारण सेयर निष्कासन गर्दैछ । कम्पनीले सिन्धुपाल्चोकमा निर्माण सम्पन्न ३६ मेगावाटको अप्पर बलेफी ‘ए’ जलविद्युत आयोजना प्रभावित स्थानीय र सर्वसाधारणका लागि छुट्याएको साधारण सेयर निष्कासन गर्न लागेको हो । सेयर निष्कासन गरी बाँडफाँड गर्न ग्लोबल आइएमई क्यापिटललाई बिक्री प्रबन्धक तोकिएको छ । आयोजनाको परीक्षण चलिरहेको छ ।
दोर्दी खोला जलविद्युत कम्पनीले २९ लाख ५१ हजार ९ सय २९ कित्ता साधारण सेयर निष्कासन गर्ने भएको छ । कम्पनीले लमजुङमा निर्माणाधीन १२ मेगावाटको दोर्दी–१ जलविद्युत आयोजनाको साधारण सेयर निष्कासन गर्न लागेको हो । कम्पनीको सेयर सिद्धार्थ क्यापिटल लिमिटेडले निष्कासन गरी बाँडफाँड गर्नेछ ।
अप्पर सोलु हाइड्रो इलेक्ट्रिक कम्पनीले ३३ लाख ७ हजार ५ सय कित्ता साधारण सेयर निष्कासन गर्ने भएको छ । कम्पनीले सोलुखुम्बुको सोलु खोलामा निर्माण सम्पन्न २३.५ मेगावाटको सोलु खोला जलविद्युत आयोजनाको सर्वसाधारण र स्थानीयका लागि छुट्याएको साधारण सेयर निष्कासन गर्न लागेको हो ।
निष्कासन हुने सेयरमध्ये १३ लाख ५० हजार कित्ता आयोजना प्रभावित स्थानीयका लागि छुट्याइएको छ । बाँकी १९ लाख ५७ हजार ५ सय कित्ता सेयर सर्वसाधारणका लागि छुट्याइएको छ । कम्पनीले सेयर निष्कासन तथा बाँडफाँड गर्न एनएमबी क्यापिटललाई बिक्री प्रबन्धक नियुक्त गरेको छ ।
अप्पर हेवा खोला हाइड्रोपावर कम्पनीले संखुवासभामा निर्माणाधीन ८.५ मेगावाटको माथिल्लो हेवा खोला साना जलविद्युत आयोजनाको स्थानीय र सर्वसाधारणका लागि छुट्याएको २० लाख कित्ता सेयर निष्कासन गर्ने भएको छ । कम्पनीको सेयर निष्कासन गरी बाँडफाँड गर्न एनएमबी क्यापिटल लिमिटेडलाई बिक्री प्रबन्धक चयन गरिएको छ । कम्पनीले निर्माण गरीरहेको आयोजना अन्तिम चरणमा पुगेको छ ।
.jpg)