ऊर्जा खबर
काठमाडौं । सूर्य नेपालले ट्रंक एण्ड डेडिकेटेड लाइन प्रयोग गरेबापतको महसुल नियमित रुपमा बुझाइरहेको छ । बारा–पर्सा औद्योगिक कोरिडोरमा रहेको सूर्य नेपालले २०७८ सालदेखि नै नियमित रूपमा महसुल बुझाउँदै आइरहेको छ ।
ट्रंक तथा डेडिकेटेड लाइन प्रयोग गरेबापत सूर्य नेपालले किस्ताबन्दीमा मासिक १२ लाख ५० हजार रुपैयाँ महसुल बुझाउँदै आएको प्राधिकरण सिमरा वितरण केन्द्रका प्रमुख रुमेश रुपाखेतीले बताए ।
‘यसअघि सूर्य नेपालको ट्रंक एण्ड डेडिकेटेड लाइन प्रयोग गरेबापतको साढे ६ करोड रुपैयाँ बक्यौता महसुल बाँकी थियो,’ उनले ऊर्जा खबरसँग भने, ‘अहिले घटाएर २ करोड ४७ लाख रुपैयाँ बाँकी छ ।’
सूर्य नेपालले आगामी आर्थिक वर्षभित्र सबै बक्यौता बुझाइसक्ने जनाइएको छ । केन्द्रअन्तर्गत ट्रंक तथा डेडिकेटेड लाइनबाट विद्युत् उपयोग गर्ने सूर्य नेपालसँगै अन्य ५ उद्योगगपनि छन् । उनीहरूले बक्यौता नबुझाएपछि लाइन काटिएको छ ।
जगदम्बा स्टिल्स प्रा.लि, जगदम्बा इन्टरप्राइजेज, अशोक स्टिल, हुलास स्टिल, हामा आईरनले बक्यौता नबुझाएपछि लाइन काटिएको छ । हुलास स्टिलको भने अदालतमा मुद्धा विचाराधीन अवस्थामा भएकोले लाइन काटिएको छैन ।
केन्द्रको तथ्याङ्क अनुसार सबैभन्दा ठुलो उद्योग जगदम्बा स्टिलको ४ अर्ब १४ करोड, अशोक स्टिलको ७८ करोड, हामा आइरनको ११ करोड ५० लाख, हुलास स्टिल्सको ४३ करोड र जगदम्बा इन्टरप्राइजेजको ४७ करोड ९८ लाख विद्युत् महसुल बुझाउन बाँकी छ ।
