ऊर्जा खबर
काठमाडाैं । नेपाल र भारतबीच बिजुली निर्यातसम्बन्धी दीर्घकालीन विद्युत् सम्झौता आज हुँदैछ । भारतीय विदेशी मन्त्री एस जयशंकरकाे नेपाल भ्रमणका क्रममा आगामी १० वर्षमा १० हजार मेगावाट विद्युत् लैजान पाउने गरी सम्झौता हुने लागेको हो ।
उक्त सम्झौतापत्रमा नेपालका ऊर्जा, जलस्रोत तथा सिँचाइ मन्त्रालयका सचिव गोपालप्रसाद सिग्देल र भारतीय ऊर्जा सचिव पंकज अग्रवालले हस्ताक्षर गर्ने कार्यक्रम छ ।
सो सम्झौतापछि भारतका सरकारी तथा निजी क्षेत्रका विभिन्न कम्पनीले अल्पकालीन, मध्यकालीन र दीर्घकालीन रूपमा विद्युत् खरिद बिक्री सम्झौता गरी बिजुली लिनेछन् । नेपाल र भारतका निजी क्षेत्रले पनि आवश्यक सहमति गरेर बिजुली आयात निर्यात गर्न सक्नेछन् ।
प्रधानमन्त्री पुष्पकमल दाहालको गत जेठ तेस्रो साता भएको भारत भ्रमणका सिलसिलामा नेपालको बिजुली भारत लैजाने गरी दीर्घकालीन विद्युत् खरिदबिक्री सम्झौता गर्ने सहमति भएको थियो । उक्त सहमतिलाई ४ सेप्टेम्बरमा बसेको भारतको मन्त्रिपरिषद्ले स्वीकृत गरेको थियो । उक्त विद्युत् खरिदबिक्रीको मोडालिटीको विषयमा समेत बैठकमा छलफल हुने कार्यक्रम छ ।
त्यस्तै, एक हजार मेगावाट भन्दा बढी क्षमतामा निर्माण गर्न सकिने तमोर जलविद्युत् परियोजना आफूले विकास गर्ने प्रस्ताव भारतले नेपालसामु बैठकमा राख्ने तयारी गरेको बुझिएको छ । मुआब्जा विवादको अवरोध खेपेको ९०० मेगावाटको अरुण तेस्रो जलविद्युत् आयोजना समयमै निर्माण सम्पन्न गर्ने विषय र पञ्चेश्वर बहुउदेश्यीय परियोजनाको डिपिआरलगायतका विषयमा पनि छलफल हुने बताइएको छ ।
यसैगरी, बैठकले दुई अन्तरदेशीय प्रसारण लाइन निर्माण गर्ने, न्यू बुटवल गोरखपुर अन्तरदेशीय प्रसारण लाइन निर्माणलाई गति दिने, भारतीय कम्पनीले अगाडि बढाएका ठूला आयोजनालाई थप गति दिइने सम्बन्धि विषयमा छलफल हुने जनाइएकाे छ ।
.jpg)