ऊर्जा खबर
काठमाडौँ । अन्नपूर्ण पावर कम्पनी प्रालिले प्रवर्द्धन गरेको ४३ मेगावाटको अपर मादी–० जलविद्युत् आयोजनाको वित्तीय व्यवस्थापन (फाइनान्सियल क्लोजर) पूरा भएको छ । आयोजनामा ६ वटा वाणिज्य बैंकले ५ अर्ब ६८ करोड रुपैयाँ सहवित्तीयकरणमा लगानी गर्ने सम्झौता भएको प्रवद्र्धक कम्पनीले जनाएको छ ।
आयोजनामा लगानीको नेतृत्वकर्ता सिटिजन्स बैंक इन्टरनेशनलले १ अर्ब ५० करोड रुपैयाँ, ग्लोबल आइएमई बैंक लिमिटेडले १ अर्ब २३ करोड रुपैयाँ, राष्ट्रिय वाणिज्य बैंकले १ अर्ब, लक्ष्मी सन्राज बैंकले ८५ करोड, नेपाल एसबीआई बैंकले ६० करोड र माछापुच्छे बैंकले ५० करोड रुपैयाँ लगानी गर्ने भएका हुन् । सोमबार एक कार्यक्रमको आयोजना गरी कम्पनीले सहवित्तीयकरण लगानी सम्झौतामा हस्ताक्षर समेत गरिसकेको छ ।
आयोजनाको अनुमानित लागत करीब रु ८ अर्ब १२ करोड रुपैयाँ छ । यस मध्ये बैंकहरूको ऋण ७० प्रतिशत र प्रवर्द्धकको स्वपुँजी लगानी ३० प्रतिशत रहने छ । कास्कीको मादी गाँउपालिकामा निर्माण प्रस्ताव गरिएको आयोजना आगामी चार वर्ष भित्रमा पूरा गरी विद्युत् उत्पादन शुरू गर्ने लक्ष्य रहेको बताइएको छ ।आयोजना निर्माणका लागि नेपाल विद्युत् प्राधिकरण, विद्युत् विकास विभाग, वन तथा वातावरण मन्त्रालय लगायत सरोकारवाला निकायहररूमा गर्नुपर्ने सबै कानूनी पूरा भइसकेको प्रवर्द्धक कम्पनीले जानकारी दिएको छ ।
कम्पनीका अनुसार आयोजनाबाट हिउँदमा ९५ हजार ८७२ गिगावाट घन्टा र वर्षायाममा १७५.०९९ गिगावाट घण्टा गरी आयोजनाबाट वार्षिक २७०.९७१ गिगावाट घन्टा विद्युत उत्पादन हुनेछ । आयोजनाबाट उत्पादन हुने विद्युत् नेपाल विद्युत् प्राधिकरणको लेखनाथ सबस्टेशनमा जोड्ने तयारी छ ।
.jpg)
