ऊर्जा खबर
काठमाडौं । बाराही हाइड्रो पावर पब्लिक लिमिटेडको आयोजना प्रभावित स्थानीयका लागि खुल्ला गरेको सेयर आवेदन अवधि थप भएको छ । कम्पनीले बागलुङको कुश्मिशेरामा सञ्चालनमा रहेको १.५ मेगावाटको ठेउले खोला जलविद्युत केन्द्रको आयोजना प्रभावित स्थानीयका लागि कात्तिक ४ गतेदेखि खुल्ला गरेको सेयर आवेदन अवधि थप भएको हो ।
माग बमोजिमको दरखास्त प्राप्त नभएकोले सेयर आवेदन अवधि थप गरिएको कम्पनीले जनाएको छ । कम्पनीका अनुसार अब स्थानीयले आगामी २५ गते (शुक्रबार) सम्म आवेदन दिन सक्नेछन् । कम्पनीका अनुसार यसअघि शुक्रबार (कात्तिक १८ गते) सम्म आवेदन दिन सकिने अवधि थियो ।
कम्पनीले सय रुपैयाँ अंकित २ करोड ५० लाख रुपैयाँ बराबरको २ लाख ५० हजार कित्ता सेयर निष्कासन गरेको छ । कम्पनीका अनुसार जिल्लाको जैमिनी नगरपालिकाको वडा नम्बर १, ४ र ५ साविक कुस्मीशेरा, सर्कुवा र विनामारे गाविस तथा जैमिनी नगरपालिकाका अन्य वडाहरुका स्थानीयका बासिन्दाहरूको लागि सेयर निष्कासन गरिएको हो ।
स्थानीयले न्यूनतम १० कित्तादेखि अधिकतम १० हजार कित्तासम्मका लागि आवेदन दिन सक्ने कम्पनीले जनाएको छ । लगानीकर्ताले एनएमबि बैंक र ग्लोबल आइएमई बैंकको कुस्मीसेरा शाखा, कुमारी बैंकको राहाले शाखा र गरिमा विकास बैंकको ट्राफिक चोक शाखा कार्यालयबाट आवेदन दिन सक्नेछन् ।
यसका साथै नेपाल धितोपत्र स्वीकृती प्राप्त गरेका सम्पूर्ण सि आस्बा सदस्य बैंक तथा वित्तीय संस्थाहरू र तिनका तोकिएका शाखा कार्यालयहररूबाट पनि आवेदन दिन सक्नेछन् ।
कम्पनीले स्थानीयको सेयर निष्कासन गरी बाँडफाँड पूरा पछि दोस्रो चरणमा सर्वसाधारणका लागि छुट्याएको ४ लाख ५० हजार कित्ता साधारण सेयर निष्कासन गर्नेछ । सेयर निष्कासन तथा बिक्री प्रबन्धकमा यसअघि नै एनआइबिएल एस क्यापिटल लिमिटेड नियुक्त गरिएको छ ।
२०७५ असार २४ गतेदेखि विद्युत उत्पादन भइरहेको आयोजनाको विद्युत् ७.५ किलोमिटर दूरीमा रहेको ३३ केभी कुस्मा सबस्टेसनमा जोडिएको छ । प्राधिकरणले उत्पादित विद्युतको हिउँदमा प्रतियुनिट ७.४२ रुपैयाँ र बर्खामा ४.२४ रुपैयाँ तिरिरहेको छ भने वार्षिक ऊर्जा औसत ८.२१७ गिगावाट घन्टा उत्पादन भइरहेको छ ।
